Sorkar laipuin scheme puan darhna atan Rs. vbc 3100 chuang hmang

Information and broadcasting minister, Anurag Thakur chuan Ningani khan Rajya Sabha-ah zawhna chhangin, Central Bureau of Communications kaltlanga sorkar scheme hrang hrang tlangzarh leh puan darhna atan, sorkar laipui chuan kum 2018-2019 aṭangin Rs vbc 3,100 chuang a hmang tawh tih a sawi.

Thakur chuan ziaka zawhna a chhannaah, media kaltlanga hmun hrang hranga scheme theh darhna atan, kum 2018-2019 chhung khan Rs. vbc. 1,179.17 hman a nih thu a sawi a, 2019-2020-ah Rs. vbc. 708.18 hman a ni bawk, a ti. Kum 2020-2021 khan sorkar chuan scheme theh darh bakah awareness a kalpui ṭan a, hetah hian Rs. vbc. 409.47 an hmang tih sawiin, 2021-2022-ah Rs. vbc. 315.98 a ni a ti bawk. Kum 2023-2024 atan hian July 13, 2023 thleng chhutin, Rs. vbc. 43.16 hman a ni tawh bawk a, heti hian kum 2018-2019 aṭanga chhutin, scheme theh darhna atan hian vawiin thlengin Rs. vbc. 3,100.42 hman tawh a ni a ti.

Sorkar scheme-te theh darhna kawnga pui turin, Central Bureau of Communication independent third-party dinin, district hrang hrang 722-ah Survey/Multimedia assessment study campaign-te an neih thu a sawi. He survey hian scheme tlangzarh leh puan darhna kawngah sawt zawk leh awmze nei zawka an kalpui theihna tur atana a puih nasat thu Thakur hian a sawi.