Japan Foreign Minister a rawn zin

Japan foreign minister, Yoshimasa Hayashi chuan ni hnih cham turin Ningani khan India a rawn thleng. Hayashi hi Asia leh Africa-a ram paruk tlawh kual programme-a hnuaia India rawn tlawh a ni a, a cham chhung hian India leh Japan thawh dunna thil hrang hrang sawiin External Affairs Minister (EAM), S. Jaishankar nen meeting an nei bawk a ni.

Hayashi hi March thlaa India-a rawn zin, Japan prime minister Fumio Kishida-a'n Indo-Pacific region-a hmasawnna hna thawhna tur atana sum thawh dan tur leh, Japan-in sum hmantir a duh thu a lo sawi tawhna hmalak chhunzawm tuma lo kal a ni ber. He Indo-pacific region-ah hian kum 2030 hmaa infrastructure leh ram venhimna tur lam chi, dollar billion 75 man hu zet thawh tum a ni. Kishida hian Bay of Bengal-North East industrial value chain concept, North-East-a industry-te hip luh theihna tur atana ruahmanna a neih pawh a lo sawi tel tawh bawk.

India a lo tlawh ṭum hian Kishida hian Official Development Assistance (ODA) chu a huang zauh a, kum zabi lo awm zel tur atana ODA dan thar siam tura Development Cooperation Charter ennawn a duh thu a sawi a. Japan chuan ṭanpuina pe zawngin inzawmna siam a, private capital-type grant aid kalphung pawh thlakin, JBIC Law siam ṭhat a duh thu a sawi a ni. Kishida hian India chu Free and Open Indo-Pacific (FOIP) hlawhtlinna tura Japan thawhpui pawimawh ni tur leh, India puihna hmanga ram Association of Southeast Asian Nations (ASEAN) ramte pawh a dawr theih ngei a beisei thu a sawi bawk.

Tun ṭuma lo zin, foreign minister, Hayashi hian Jaishankar nena an meeting-ah ram sum leh pai dinhmun tlak chhiat avanga tal buai mek Sri Lanka chungchang bakah, September-a neih tur, G20 Leaders level summit an sawi dun ngei rin a ni. Hayashi leh Jaishankar te hi Quad Foreign Ministers meeting, March 2023-a neih zawh takah khan an lo inhmu tawh bawk a ni.