Maan Ki Baat : PM Modi-a'n martar-te chawimawi nan 'Meri Mati Mera Desh' campaign a puang

Prime minister Narendra Modi chuan thla tina Pathianni hnuhnung bera radio programme a hman ṭhin, Mann Ki Baat ṭum 103-na chu nimin khan a hmang a, ram tana nun hlantu mi huaisente chawimawi nan 'Meri Mati Mera Desh' campaign kalpui a nih tur thu a puang.

Prime Minister chuan, "Heng mi chhuanawm tak takte hriatrengna thuziak, ramchhunga village panchayat nuai chuangah chhutkai a ni ang a, ramchhung hmun hrang hranga martar-te vap dahna bawm 7500 keng kuala Amrit Kalash Yatra neih chu Delhi-ah hun tawp hman a ni bawk ang. Yatra-ah hian ramchhung hmun hrang hrang aṭanga lakkhawm thingṭiak ken a ni bawk ang. National War Memorial bulah an vap leh thingṭiak hmang hian Amrit Vatika sak a ni ang a, Amrit Vakita hi 'Ek Bharat Shresth Bharat' entirna symbol a ni dawn a ni" tiin a sawi.

PM chuan NDRF mi leh sate chu ruahsur leh tuilian nasa tak tuartute chhanchhuah hna thawk a, nunna an chhanhim avangin a fak bawk.

Modi chuan, "Yamuna lui leh hmun dang nasa taka a len avangin, mi tam takin an tuar a ni. Tlang ramah lei a min bawk. Chutih laiin khaw thlang lam, Gujarat-ah Biparjpoy cyclone a tleh. Hetiang khuarel chhiatna thleng karah hian ramchhung mipuite'n ṭanrual hlutzia an lantir leh a ni," a ti.

Modi chuan America chuan India rohlu za chuang an pe kir leh tawh tih pawh sawi langin, "Heng artefact India-a pekkirte hi kum 250 aṭanga 2500-a upate an ni hlawm. Heng thil hlute hi ramchhung hmun hrang hrang nena inzawma neite an ni a; terracotta, stone, metal leh wood hmanga thil siamte an ni. Heng thil ṭhenkhat te phei hi chu in hmuh hunah, mak tihnain in khat dawn. Kum zabi 11-naa sandstone hmanga lim siam mawi tak pawh a tel a ni. He thil hi 'Apsara' lam lai a ni a, Madhya Pradesh state ta a ni," tih Mann Ki Baat a hmannaah hian a sawi.

Prime Minister chuan Uttarakhand hmeichhiate chu hnam rohlu, "Bhojpatra' thingkung an venhim avangin a fak bawk. "Uttarakhand hmeichhiate hnen aṭangin lehkha ka dawng a, heng hmeichhiate hian nikum October thla khan Bhojpatra artwork mawi danglam tak min pe a, ka lawm tak zet. Hmanlai aṭangin kan lehkhabu leh sakhua chanchinte chu Bhojpatra-ah ziah a a ni ṭhin a, Mahabhrata pawh Bhojpatra-ah ziah a ni. Vawiinah hian, heng Devbhoomi hmeichhiate hian Bhojpatra aṭangin artefact leh souvenir mawi mawi tak tak an siam chhuak ṭhin. Mana khua ka tlawh khan an thil siamte mawizia ka va hmu. Zin miite chu Devbhoomi tlawh tur leh an thil siamte hi leisak turin ka ngen a ni," a ti.

Prime Minister Narendra Modi chuan Mann Ki Baat vawi 103-na a hmannaah hian India chuan ruihlo dona kawngah nasa takin hma a la zel tih a sawi a, "Ruihhlo kg nuai 1.5 mante chu tihchhiat a ni. India chuan ruilhlo kg nuai 10 tihchhiat record a nei mek," tih a sawi.