ISRO-in PSLV-C56 rocket kap chhuak

Indian Space Research Organisation (ISRO) chuan nimin khan Singaporean satellite pasarih phurtu, PSLV-C56 rocket chu Satish Dhawan Space Centre, Sriharikota aṭangin hlawhtling takin a kap chhuak.

ISRO chuan an twitter-ah an mission chu hlawhtling taka hlenchhuah a ni ta tih tarlangin, PSLV-C56 vehicle chuan satellite pasarih chu orbit-a an awmna tur hmunah a thlen tih a sawi. Satellite pasarihte hi DS-SAR primary satellite pakhat leh, co-passenger satellite paruk a nih tih ISRO chief S Somanath chuan a sawi bawk.

DS-SAR hi radar imaging earth observation satellite a ni a, Singapore sorkara Defence Science and Technology Agency leh ST Engineering-ten an siam a ni. Synthetic Aperture Radar (SAR)-a thuam niin, hei hi chhun leh zanah hman theih vek a ni dawn tih ISRO chuan a tarlang.

Union minister of state for science & technology, Jitendra Singh chuan ISRO team chu lawmpuina a hlan a ni.