Kum 2019 -2021 chhungin hmeichhia nuai 13 chuang an bo

Parliament monsoon session neih mekah Union Home Ministry chuan kar hmasa khan National Crime Records Bureau (NCRB) report chhawp chhuakin, NCRB chhinchhiahna aṭanga a lan danin India-ah kum thum (2019-2021) chhungin hmeichhia nuai 13 chuang an bo.

Hmeichhe bote hi kum 18 chung lam 10,61,648 leh, kum 18 hnuai lam 2,51,430 te an ni a, heng zingah hian Madhya Pradesh aṭanga bo tam berin, West Bengal-in a dawt a ni.

Madhya Pradesh-ah hian kum 2019-2021 inkar khan hmeichhe kum tling lo 38,234 leh kum tling tawh 1,60,180 an bo a, hemi chhung vek hian West Bengal-ah chuan kum tling lo 36,606 leh kum tling 1,56,905 an bo bawk. Maharashtra chu hmeichhe bo tamna lama pathumna niin, kum 2019-2021 chhung khan kum tling lo 13,033 leh kum tling tawh 1,78,400 an bo a ni.

Union Territory zingah Delhi chu sang berin, kum 2019-2021 chhungin hmeichhe kum tling lo 22,919 leh kum tling tawh 61,054 an bo niin an tarlang bawk.

Sorkar laipui chuan Parliament-ah ram chhunga hmeichhiate himna tura hmalakna hrang hrang neih a nih thu a sawi. Hur sualna hawia hmeichhiate laka chetna hremna tur, The Criminal Law (Amendment) Act, 2013 bakah, The Criminal Law (Amendment) Act, 2018; hmeichhe naupang kum 12 hnuai lam pawngsualtu thi tura a chungthu relsak theihna thlenga dan an siam thu an sawi a ni. Heng dante hian pawngsual case chhui leh thubuai theh luh hun chhung chu thla hnih aia rei lo leh, thubuai ngaihtuah chhung pawh thla hnih aia rei lo tura a phalsak thu an sawi bawk.

India ram puma hman theih, emergency-a call theih number (112), Emergency Support Response System hmanga harsatna tawh a nihna hmuna ṭanpuina pawh tir nghal thei tur an hman tawh thu sorkar chuan a sawi. Technology chu mipui himna atana ruahmanna siam nan leh police hna ṭanpuitu atan an hman ṭangkai thu sawiin; Safe City Project chu khawpui pariatah (Ahmedabad, Bengaluru, Chennai, Delhi, Hyderabad, Kolkatta, Lucknow leh Mumbai) bul ṭan hmasak a nih thu a sawi bawk.

Home Ministry chuan September 20, 2018 khan mipuite'n cyber crime an report theihna tur portal an hawn thu sawiin, ram chhunga hur sualna lama sulhnu neite chhui chhuah awlsamna tur atan National database an buatsaih tawh thu Parliament hi a hrilh bawk a ni.