Manipur tlawhtu eptu MP-te'n I.N.D.I.A hruaitute hnenah report pe

Eptu party MP eng emaw zat, Manipur buaina a hmuna thlithlai tura kalte chuan nimin khan Parliament house-ah meeting neiin, eptu party inzawm khawm, I.N.D.I.A hruaitute hnenah Manipur dinhmun an hmuh dan report an pe.

Manipur tlawhtu zinga mi, Congress hruaitu Adhir Ranjan Chowdhury chuan Manipur dinhmun chu derthawng a tih thu a sawi a,"Sorkar lai MP tu pawh kalin a hmunah ngei buaina hi hmu ve se Manipur chungchangah hian thuchhuah an siam liam mai mai ka ring lo," tiin a sawi.

Eptu MP 21 te chuan kar hmasa kar tawp khan Manipur hi an tlawh a, relief camp an tlawh bakah harsatna tawk mipuite chu an kawm bawk. Eptu party-te hian Parliament session neih mekah prime minister Narendra Modi chu Manipur chungchang House pahniha sawi tur leh, session-a Manipur dinhmun sawihona hun siam turin an nawr mek a ni. Heng an thil phut leh nawrte hi nasa zawka beih chhunzawm an tum thu leh mumal zawka sawihona neih an duh thu pawh an sawi bawk.

Meeting-ah hian Congress Parliamentary Party chairperson, Sonia Gandhi bakah, Mallikarjun Kharge leh I.N.D.I.A hruaitu eng emaw zat an tel a ni.