AAP-in Rajya Sabha rorelnaah an party MP tel vek turin ti

Parliament session neih mekah Aam Admi Party (AAP) chuan nimin khan Rajya Sabha-a an MP zawng zawngte tan whip notice chhuahin, July 31 aṭanga August 4 chhunga house rorelnaa awm vek tur leh, Delhi-a hman tur ordinance bill put luh a nih huna party-in a dodalna kawnga ṭan la vek turin a hrilh.

Party chief whip, Sushil Kumar Gupta chuan whip notice-ah hian,"July 30, Thawhṭanni, August 1, Thawhlehni, August 2, Nilaini, August 3, Ningani leh August 4, Zirtawpniah te hian Rajya Sabha-ah thu pawimawh tak, National Capital Territory of Delhi (Amendment) Bill, 2023 sawihona leh pawmna neih tum a ni. Hei vang hian AAP member, Rajya Sabha MP zawng zawngte chu heng ni-ahte hian house-a nilenga awm vek tur leh, party dinna thlawp tura hriattir in ni. He thuchhuah hi ngaihpawimawh ṭheuh tur a ni," tiin a chhuah.

Delhi-a group A officer-te siksawi theihna tura thuneihna central sorkar kuta dahna tur, National Capital Territory of Delhi (Amendment) Bill, 2023 hi tun kar chhung hian Parliament house pahniha sawiho tura ruahman a ni.