Covid-19 vangin Doctor 515 in nunna an chan tawh: IMA

Indian Medical Association (IMA) chuan nimin khan ram chhungah Covid-19 vangin doctor 515 in nunna an chan tawh tih a tarlang. 

IMA president Dr Rajan Sharma chuan, "Kan list thar berah chuan Covid-19 hri kaite enkawltu doctor zinga 515 chuan he hri vang hian an nunna an chan tawh a ni. Nunna chante hi allopathic doctor vek niin, IMA branch kaltlangin finfiah vek an ni," a ti.  Ram chhungah hian branch 1,746 a awm a, report kimchang an hriat theih hunah chuan doctor nunna chan zat hi hei ai pawh hian an la tam zawk maithei tih a sawi bawk. 

Hetih lai hian sorkar laipui lam chuan Covid-19 kaite enkawlna lama hri kai a, an nunna chan doctor zat chhinchhiahna hi a siam lo niin a sawi thung. Minister of state for health Ashwini Kumar Choubey chuan Parliament session-ah khan public health leh hospital-te chu state sorkar hnuai a nih avangin sorkar laipui chuan hetiang lam database hi a siam lo tiin a sawi a ni. 

Hei hi IMA lam chuan na takin an sawisel a, Dr Shama chuan sorkar laipui chu a mawhphurhna la zo loah a puh. "Reverse transcription-polymerase chain reaction (RT-PCR) hmanga Covid-19 test neih dawnin Aadhar Card neih a ngai a, hetichunga central level-a database an siam thei lo hi thil awm lo tak a ni," a ti.