No trust motion sawi loa bill dang pass hi Parliament zah lohna a ni : Congress

Lok Sabha rorel inkhawmah eptu MP-te leh rorel laite an la inau buai chhunzawm reng a, Thawhṭanni khan eptu party MP-te chuan prime minister Narendra Modi chu Parliament-a thu sawi ngei tur leh, rule 267 hmanga Manipur buaina chungchang sawiho phutin an au rual leh a ni.

Hetih lai hian sorkar chuan eptute'n Manipur chungchang sawiho phuta an au chhuah karah film pirate ṭhin tihtlem nan Cinematograph Amendment Bill, 2023 a pass.

Congress party hruaitu, Adhir Ranjan Chowdhury chuan, no trust motion chu rel leh sawiho phawt tur a nih thu leh, motion pawm a nih hnu pawha sawihona hun nei loa bill dang pass chu Parliament zah lohna a ni, tiin a sawi.

Sorkar laipui hian no trust motion put luh a nih hnu hian bill pawimawh tak tak pasarih a pass tawh a, he thilah hian eptu MP-te chuan no trust motion sawiho loa bill pass dan kawng an zawng zel chu Parliament rorel dan phung a ni lo tiin an sawi a ni.

Rajya Sabha-ah pawh rorel chhunzawm thei loin eptu party MP-te chu Manipur chungchang sawi phutin an la au buai reng. Kar hmasa lamah sorkar laipuiin Manipur chungchang sawi hi duh rih lo mah se, sawihona neih a remti tawh nia hriat a ni. Rajya Sabha chairman, Jagdeep Dhankar pawhin" Ram pumpuiin min thlir reng a, hetiang reng chuan entirna ṭha lo tak kan hnut chhiah dawn a ni. Sorkar pawh Manipur chungchang sawi tur hian a inpeih tawh e," tiin a sawi.