Haryana buaina chhuakah mi 5 thi, Gurugram-ah Mosque hal a ni

Haryana-a Nuh district-a Vishva Hindu Parishad hmanga kawng zawhte dan an nih avangin buaina a chhuak a, buaina kaihhnawihah hian mi panga an thi tawh niin Thawhlehni khan police-te chuan an sawi.

Nuh district-a buaina hian Gurugram kangkaiin Thawhṭanni khan Haryana, Gurugram-a sector 57-a Mosque chu beih a ni a, silai kah a nih bakah mosque hi hal a ni tih an sawi. Thuneitute chuan mipui lungawi lo kal khawm zingah silai hmet puak an awm a, hemi hnu hian mosque pawh hi hal a ni an ti a; Bihar lam mi, Saad ti-a hriat, kum 26 mi chu he buaina chhuahna hmunah hian a thi tih an sawi. Police-te chuan mipui kal khawm hian sector 57-a Anjuman Masjid hi zanlaiah an thleng niin an sawi bawk.

Buaina chhuakah hian mi panga an thih tawh bakah, mi 23-in hliam tuar bawkin, hliam tuar zingah hian police mi leh sa 10 an tel. He buaina kaihhnawihah hian police-te chuan FIR 11 theh luh a ni tawh tih sawiin, mi 27 man an ni tawh. Lirthei 120 chuang hal leh tihchhiat niin, lirthei pariat chu police hman lai a nih thu an sawi bawk. Muslim tamna, Nuh district-a buaina chhuak hi a darh hnuin Sohna-ah lirthei leh dawr hal a awm bawk niin thuneitute chuan an sawi.

Haryana home minister Anil Vij chuan nimin khan Nuh district-ah hian curfew puan a nih thu a sawi. Chief minister Manohar Lal Khattar chuan, dan leh thupek khauh taka ken kawh a ni tih sawi bawkin, buaina siamtute chu na taka hrem an ni ang, a ti.