Indian Army-ah hmeichhiate tan hmun tam zawk siam dawn

Minister of state for defence Ajay Bhatt chuan Thawhṭanni khan Rajya Sabha-ah CPI MP, Sandosh Kumar zawhna chhangin; sorkar laipuiin Indian Army-ah hmeichhe tam zawk an luh theihna tur atan ruahmanna a neih thu a sawi.

Ajay Bhatt hian, July 2022 aṭanga hman ṭan tawh, National Defence Academy, Pune-ah hmeichhe cadet tan kum tin seat 20 dah a nih thu a sawi. Short Service Commission chuan hmeichhe tan vacancy 90 nei ṭhinin, hei hi June 2023 aṭanga khan 10 belhin, hmeichhe tan vacancy 100 siam a ni tawh tih a sawi bawk.

Heng bakah hian hmeichhe officer tana Artillery, Remount leh Veterinary corps-a luh theihna chu March 2023 khan phalna an hmu tawh a, Army aviation-a pilot anga hmeichhiate an luh theihna tur pawh June 2021 khan phal a ni tawh tih a sawi bawk. 2019 aṭang khan Indian Army hnuaia Military police corps-ah hmeichhiate tan inziah luh theih a ni tawh bawk tiin Minister hian a sawi a ni.

"July 1, 2023 thleng khan Indian Army, Medical cadre-a hmeichhe awm zat chu; Army Medical Corps (AMC)-ah 1,212; Army Dental Corps (ADC)-ah 168 leh Military Nursing Service (MNS)-ah 3,841 te an ni. AMC, ADC leh MNS tel lo hian January 1, 2023 thleng khan, Indian Army-a hmeichhe officer awm zat chu 1,733 an ni," tiin Ajay Bhatt chuan a sawi.