Tourism chawikanna atan Army-te'n ram pe

Jammu and Kashmir khawpui, Srinagar-a sipaite awmna ṭhin, Tattoo ground, acre 139.04 zeta zau ram chu sipaite chuan chhuah sanin, an hmun hi tourist hipna leh tourism kaihhnawih thil chi hrang hrang atana hman turin Jammu and Kashmir sorkar hnenah an hlan.

Tattoo Ground inhlanna atan hian Ministry of Defence chuan J&K UT-a sorkar kaltlangin Ministry of Home Affairs nen inremna (Memorandum of Understanding) an ziahpui. Ministry of Defence chuan ni 120 ral hmain ram hi an hlan fel dawn niin an sawi a ni.

J&K lieutenant governor Manoj Sinha chuan Army-te chu fakawm a tih thu leh, an hun hman chu ropui a tih thu a sawi a, "MoU-a kan ziah ang ngei hian kan theihtawpin tihhlawhtlin kan tum ang. Kashmir valley rawn tlawhtu khualzin zawng zawngte'n Tattoo Ground chu mawi leh tlawh manhla ber an tih turin kan buatsaih ang" tiin a sawi.

Kum 2009, December thla khan, khatih hun laia union home minister P. Chidambaram chuan army-te'n Tattoo Ground an chhuah san tur thu hi a puang tawh a, khaw chhunga mipui leh sipai inchiahpiah lutuk tur tihtlemna atana ruahman a ni. Tattoo Ground-ah hian indona tam tak a lo thleng tawh ṭhin a, firfiakte pawhin sipai hmun hi luh ruk tum foin, sipai nunna chan pawh an lo awm nual tawh a ni.