Rahul Gandhi chunga UP police chet dan duh loin Puducherry CM-in chaw ngheiin nawrh huaihawt

Puducherry chief minister V Narayanasamy leh a thawhpui minister-te chuan Rahul Gandhi leh a farnu chunga Uttar Pradesh police-te chet dan duh lohna lantirin, nimin khan chaw ngheiin nawrh an huaihawt. 

Ningani khan Congress hruaitu Rahul Gandhi leh a farnu Priyanka Gandhi Vadra bakah party worker 150 vel chu Uttar Pradesh-a Hathras khuaa pawngsual rawn tawktu hmeichhia chhungte hmuh tumin an kal a,  mahse UP police chuan lo dangin an unau hian an hreng zui a, mahse a hnuah an chhuah leh a ni. Police-te nen an innawrnaah Rahul Gandhi hi ṭum khat leiah a tlu nghe nghe a ni. 

September 14 khan dalit hmeichhia kum 19 mi chu Hathras khuaah hian mipa paliin an pawngsual rawn a, a dinhmun a ṭhat loh avangin Delhi-a Safdarjung hospital pan pui a nih hnuah, Thawhlehni khan a boral zui nghal a ni. Hei vang hian rampum huap pawhin he thil thleng duh lohna hi lantir a ni nghal bawk.