PM-in khawvela highway tunnel sei ber hawng dawn

Prime Minister Narendra Modi chuan khawvela high­way tunnel sei ber 'Atal Tunnel', Rohtang, Himachal Pradesh-a mi chu vawiin hian a hawng dawn.

Tunnel a hawn hnu hian Prime Minister chuan Sissu, Lahaul Spiti leh Solang Valley a tlawh nghal dawn bawk a ni.

'Atal Tunnel' hi khawvela high altitude tunnel sei ber niin sea level aṭanga feet 10,000 a sang a ni a, Manali leh Lahaul-Spiti valley inkalpawhna niin km 9.02-a thui a ni.  Manali leh Leh inkar kawng chu he tunnel kaltlang hian a hmaa an kalkawng zawh ṭhin aiin km 46 velin a tawi tawh zawk dawn a, zin chhung pawh darkar li aṭanga darkar nga velin a rei lo zawk dawn a ni. 

Prime Minister Office-in a tarlan dan chuan he tunnel hi kum tluanin a zawh theih dawn a, tunnel hawn hma hi chuan helai kawng hi kum khatah thla ruk vel vur sur vangin a tlawh pawh theih loh ṭhin. 

Atal Tunnel south portal hi Manali aṭangin kum 25 vela hlaa awm a ni a, north portal lam chu Teling, Sissu, Lahaul valley bulah a awm thung. Nitin car 3,000 vel leh truck 1,500 vel tlan tur anga hisap niin, June 2, 2000 khan Atal Bihari Vajpayee kaihhruai sorkar chuan tunnel siam tur hian thutlukna a siam a; tunnel south portal lamah hian may 26, 2002 khan tunnel lungphum hi an phum a ni. 

A tirah chuan Rohtang Tunnel tia sawi ṭhin ni mah se Atal Bihari Vajpa­yee hriat­rengna atan a hming chawiin Atal Tunnel an ti ta a ni.