Sorkar laipuiin MGNREGA aṭanga hlawh Rs vbc 6,366 la ba

Union Ministry of Rural Development chuan sorkar laipuiin Mahatma Gandhi National Rural Employment Guarantee Scheme (MGNREGA) hnuaia state leh UT 18- te hnena hlawh pek tur, Rs. vbc 6,366 chu a la batsak tih Parliament a hrilh.

MGNREGA hnuaia inhlawh hi mi vbc 14.42 an awm mek a, a tam zawk hi hmeichhia niin, chhungkaw innghahna atana hmang an ni hlawm. Pawisa la pek loh aṭanga Rs. vbc 2,770 hi West Bengal sorkar hnena la bat a ni. West Bengal hian sorkar laipui thuchhuah a zawm lo nia hriat avangin MGNREGA Act hnuaia section 27 hmangin Rs. vbc 7,500 chu an la pe duh lo a ni. MGNREGA hnuaia section 3(3) chuan ni khat hlawh hi kar tawpah kar tin pek tur tih a ni a, hei hi a remchang lo a nih pawhin kar hnih danah tal pek tur a ti a ni.

West Bengal dawtah hian Congress sorkarna, Rajasthan chu sorkar laipuiin MGNREGA hnuaia hlawh a la pek loh hnem ber a ni a, Rs. vbc 979 a batsak. JD(U) leh RJD sorkarna, Bihar chu pathumna niin, MGNREGA sum hi sorkar laipui hian Rs. vbc 669 a la ba bawk.

State leh UT 30 hnenah MGNREGA kaltlanga hmanrua leh thil dang a pek tur, Rs. vbc 6,266 hu chu sorkar laipui hian a la ba bawk a ni. Hmanrua leh thil dang mana hman tur sum zawng zawng 60% hi sorkar laipui tum tur a ni a, a bak 40% hi state tum ve tur a ni thung. Sorkar laipuiin a tum tur a pek vat loh hian nghawng thui zawk a nei a, hmalak lehna tur tam tak a tikhaihlak a, bungrua leh hmanrua a tam thama leitirtute hian an bungruate lei chhunzawmtir an ngam ṭhin lo bawk. Hei hian MGNREGA hnuaia hnathawh kal lai a titawp ta ṭhin a ni. Heng bungrua leh hmanraw manah hian sorkar laipui hian West Bengal hnena a pek tur Rs. vbc 2,813 a la ba a, Uttar Pradesh hnena pek tur Rs. vbc 777 leh Karnataka hnena pek tur, Rs. vbc 634 a la ba bawk a ni.