UK-a India embassy beih chungchangah NIA-in Punjab leh Haryana-a hmun 31 an dap

London, UK-a High Commission of India, March 19, 2023-a beih a nih chungchangah National Investigation Agency (NIA) chuan thil awm dan chhuiin hma a la zel. Thawhlehni khan NIA chuan Punjab leh Haryana-ah hmun 31 chu rinhlelh thilah an dap.

Hmun hrang hrang an dapna aṭang hian NIA hian khawla dah ṭhat, High Commission beihnaa a bul tumtua puh chanchin hriat theihna tur thil awmna leh finfiahna atana hman theih tur data awmna an man a ni.

NIA thupuangtu chuan London-a India embassy beihna phena pawikhawihtu emaw, anmahni puitu leh an thawhpuite pawh, India-ah an awm emaw awm lo emaw, man vek an tum thu a sawi. NIA chuan venhimna ṭha tawk lo avanga pawikhawihna a thlen nawn lohna atan leh, India flag zah lohna lantirna remchang leh ram danga India dinhmun a derthawn lohna tur atan pawh theihtawpa he pawikhawihna thlentute man ngei an tum thu an sawi bawk.

London-a High Commission of India hi March 19 khan mi 50 rualin an bei a, High Commission-a thawk mi eng emaw zatin hliam an tuar a ni. Embassy beihna hi India mi Gurcharan Singh leh Dal Khalsa leh, UK-a KLF mi Avtar Singh Khanda bakah Jasvir Singh leh anmahni puitu mi eng emaw zat tih a ni tih NIA chhuina chuan a tarlang. India embassy beihna chhui chiang tur hian NIA hi May thla khan UK-ah hian kal tawhin, vantlang mipui puihna an dil aṭangin embassy beitu ṭhenkhat an hriat theih phah a ni.