Haryana buainain Delhi a kan kai hlauhna a lian

Haryana Nuh district-a Hindu leh Mosolman inkara buaina chhuak chuan Gurugram sector 70-ah pawh sakhaw zuitu pahnihte inkarah buaina a thlen ve leh a, Gurugram hi Delhi aṭanga km 20 chauha hlaa awm a nih avangin Delhi-ah hian buaina a chhuah ve leh mai hlauhna a lian hle a ni.

Nuh-ah hian Thawhṭanni khan sakhaw thil avanga pun khawmna buatsaih a nih laiin mi tu tih hriat lohte'n an bei a, mi 2,500 chuang chu sahimna zawngin temple-ah an tlan lut a ni. Hemi ni hian boruak rit chho zelin, zanlai pelh hretah Muslim mosque hal a ni a, lirthei tam tak tihchhiat leh hal a awm bawk. He buainaah hian venhim hna thawktu pahnih leh civil mi pahnih an thi a, pakhat hi mosque-a hnathawk lai a ni.

Thawhlehni zan khan buaina chhuak chhunzawmin, Gurugram police-te chuan khaw chhung hmun ṭhenkhatah buaina tenau chhuak zeuh zeuh a la awm thu an sawi. Nuh district-ah hian curfew puan a ni tawh bawk.

Nuh thlang lam km 50-a awm, Badshahpur-ah pawh intualvuakna thlengin, mipui 200 vel kal khawmin dawr ṭhenkhat an tichhia a, sakhaw thuchham chham chunga sa zawrhna dawr an luhchilh thu leh an hal thu an sawi bawk. Palwal-ah mipui pung khawmin Parshuram colony-ah in 25 halin, thi leh hliam erawh an awm lo niin police-te chuan an sawi.

Gurugram khaw ṭhenawma, Sohna-ah school leh college khar a ni bawk. Delhi-ah pawh buaina chhuah hlauhna avangin police tam tak patrol-a tirh an ni a, hmun ṭhenkhat chu drone hmanga vil reng a ni.