I.N.D.I.A MP-te'n President Murmu meeting neihpui

Indian National Developmental Inclusive Alliance (I.N.D.I.A) MP ṭhenkhat leh president Droupadi Murmu-te chuan August 2, Nilaini khan meeting an nei a, eptu MP-te hian President chu Manipur buaina chungchanga Parliament-a thusawi tura Prime Minister lo nawr ve tura an duh thu an hrilh.

Meeting-ah hian Congress president Mallikarjun Kharge chuan Manipur dinhmun-te President hi a hrilh a, prime miniter Narendra Modi chuan Parliament-a thusawi a hlau a ni, a ti. Trinamool Congress hruaitu, Sushmita Dev chuan Rajya Sabha-a nominated seat ruak awm chu Manipur-a hnamte zinga mi ruatin hnawh khah thuai ni se, anni chuan an state dinhmun dik tak rawn sawi bawk se a duh thu President hi a hrilh ve bawk.

National Conference hruaitu, Farooq Abdullah chuan President chu Haryana-a Muslim-te'n harsatna an tawh thu hrilhin, he buainaah hian inrawlh a, dan kenkawhna mumal tak awm leh thuai tura state sorkar chu hma la tura hrilh turin a ngen.

Kar hmasaa Manipur tlawhtu, eptu MP 21-te pawhin President hnenah hian memorandum an theh lut. Manipur state dinhmun an hmuh dan leh, dan leh thupek mumal awm loa rorelna a tlakchhiat nasatzia an sawi. "Manipur buaina chungchanga Parliament hmaa thusawi tur leh, Manipur dinhmun sawihona nei tur hian Prime Minister hi kan nawr reng a, nang pawhin PM hi lo sawipuiin, lo nawr ve la kan duh a ni," tiin Memorandum-ah hian an ziak.

Meeting neih zawha press conference an neihnaah Kharge chuan,"Manipur-ah mi 200 chuang thi tawhin, mi 500 aia tam hliam tuar an awm. Mi 60,000 chuang chenna nei loa awmin, in 5,000 chuang hal a ni bawk. Raltlan leh chenna nei lote tana siam, rehabilitation camp-te chuan damdawi mamawh a tlachham a, chenna tlak pawh a ang lo," tiin a sawi.