"Puh ka nihnaah hian ka tisual lo" - Rahul Gandhi

Intihhmingchhiatna thubuaia Surat court-in thiamloh a chantir hnu leh, Gujarat High Court-in a hremna stay a phal loh hnuah Rahul Gandhi-a'n Supreme Court-a petition a theh luh chu vawiin hian, Justice BR Gavai kaihhruai bench-in a ngaihtuah dawn. Nimina Supreme Court-a a thu theh luhah hian Gandhi chuan thiam a chan theihna tur atana ngaihdam a dil loh tur thu a sawi.

Gandhi chuan MP hna a chhunzawm leh vat theihna atan thiam loh chantir a nihna chu stay turin dil a, hemi rual hian Surat court thutlukna chu a dik tawk loh avanga a la hneh let ngei theih a rin thu a sawi bawk. Supreme Court hriata statement a siam hmasak berah hian Gandhi chuan puh a nihnaah chuan tihsual a neih loh thu sawiin, ngaihdam dil ngai ni se a dil daih tawh tur thu a sawi a ni.

Congress hruaitu hian ngaihdam a dil dawn loh thu a sawi hnua mawl titu leh a laka thubuai theh luttu, BJP MP, Purnesh Modi pawh sawiselin, "Karnataka-a ka thusawi lai chu mimal takin a ngaithlain a hre hauh lo a, Whatsapp-a IANS article screenshot a hmuh aṭanga ka sawi tur awm ang zeldinin a thubuai theh luhah pawh a rin dan chu ṭan chhanah a hmang mai mai a ni," tiin a sawi. "Purnesh hian Whatsapp-a a thu dawnna pawh hi a sawi tel reng reng lo a ni," a ti bawk.

Surat district court-in thiam loh a chantir hnuah Gandhi hian Gujarat High Court-ah appeal-in, a thubuai leh a hremna (kum hnih jail tan) stay tura a dilna chu a hnawlsak a, bail chiah a phalsak a ni. Hemi hnu hian Rahul Gandhi hian thiam loh chantir a nihna chuan a duh zawng sawi tura zalenna a neih, a ngaihdan a pho chhuahna, ngaihtuahna leh chet chhuahna, constitution-in a phalsak vek chu nek chepin a awm thei dawn a ni tiin Supreme court-ah hian a thubuai stay tur hian appeal a siam leh a ni.