Supreme Court-in Rahul Gandhi hremna a stay

Intihhmingchhiat thubuaia Gujarat magistrate court-in Congress party hruaitu, Rahul Gandhi thiam loh a chantirna chu nimin khan Supreme Court chuan a 'stay'.

Rahul Gandhi hian a hremna stay tur hian Supreme Court-ah petition a theh lut a, nimin khan Justice BR Gavai, PS Narasimha leh Sanjay Kumar te awmna bench chuan ngaihtuahin, Gandhi hi hremna sang ber pek a ṭulna a awm lo tiin a hremna hi a stay-sak ta a ni.

Supreme court chuan, kum 2019 Karnataka rally-a Gandhi thusawi kha hai rual lohin thil ṭha lam a ni lo a, a thu chhak chhuah danah mipui hmaa thusawi leh mite ngaihven a nihna angin a fimkhur tawk lo tih a lang, a ti. Hemi rual hian he thubuaia hremna pek a nih avanga Parliament member a nihna aṭanga ban a nih hialna hian a mimal dikna mai ni loin, inthlan dan phung thlengin a nghawng tih a sawi.

Bench chuan, "Thubuai ngaihtuahtu hian hremna sang ber (kum 2 jail tan) a pe a, hei hi ni khat lek pawhin lo titlem se, a nihna aṭanga ban a ngai lo mai tur a ni. Hremna sang ber pek a nih chhan hi sawi fiah a ni lo a, chuvangin, thubuai ngaihtuah a nih leh hma chuan Gandhi hremna hi stay rih a ni," tiin a tarlang.

Thiam loh a chan avang hian Rahul Gandhi hi MP a nihna aṭangin ban a ni a, Parliament session ṭum hnih a hmaih phah a ni. Supreme court-in a hremna a stay takah hian MP a nihna pawh a ngai angin a chelh leh thei dawn a, election pawh a hmachhawn leh thei dawn a ni.

Gandhi hremna stay a ni chu "Inhuatna aiin hmangaihna chu hnehtu a ni," tiin Congress party chuan an lawm thu hi an tweet nghal.