Lok Sabha-ah Delhi Services bill pass

Delhi-a officer-te transfer leh posting chungchanga thuneihna, Delhi sorkar kut aṭanga chhuhsak a, sorkar laipui kutah dahna tur, The Government of National Capital Territory of Delhi (Amendment) Bill, 2023 chu Ningani khan Lok Sabha-ah darkar li chuang sawiho a nih hnuah pass a ni.

Lok Sabha-a bill sawiho a nih lai hian sorkar lai leh eptute an inhnial nasa hle a, Speaker-in vote lak a rawt laiin eptu MP-te chu house aṭang hian an chhuak a ni.

Bill sawi hawngtu, union home minister Amit Shah chuan Parliament hian India khawpui tana dan siam hi a ṭul chuan a ti thei tiin, "Delhi hi state ni loin UT a ni a, Parliament hian Delhi-a hman tur dan siam tur hian thuneihna a nei a ni," a ti. Delhi-a sorkarna siamtu Arvind Kejriwal kaihhruai AAP sorkar chu an eiruk leh hausaknate zep a, thup an duh avangin anmahni thlithlai theitu department-te chu thunun an duh mai a ni, tiin a sawi.

Lok Sabha-a Congress hruaitu, Adhir Ranjan Chowdhury chuan bill chu India kalphunga thuneihna insemna kalh a ni, a ti. NCP MP Supriya Sule chuan,"BJP hian ze ṭha lo deuh an nei a, inthlan dawn apiangin Delhi chu state nihna pek in tiam a, dawt in sawi em ni? BJP hian J&K chu UT-a ṭhenin a tichhe vek a, kum li hnuah pawh inthlan a la buatsaih leh thei lo," a ti.

Congress MP Shashi Tharoor leh Karti Chidambaram pawhin bill thar chu India democracy tana thil hlauhawm tak a nih thu an sawi. Tharoor chuan,"No-confidence motion move a nih lai rengin engtin nge kalphung thlakna tur thil dang sawiho a nih?" a ti. DMK MP, Dayanidhi Maran pawhin,"BJP thawhpui chu ED, CBI leh agency dangte an ni. Delhi-ah hian mipui thlan sorkarin ro a rel avangin BJP hian pawm har an ti a, ED director tenure pawtsei turin Supreme court-ah an kal hial a ni. Enforcement Directorate hi an chak theihna hnar pakhat a ni," tiin Delhi services bill a duh lohna sawi ve bawk.