Home Ministry-in Save The Children FCRA permit titawp

Ministry of Home Affairs chuan Foreign Contribution Regulation Act (FCRA) hnuaia UK-based NGO Save The Children, India rama Bal Raksha Bharat hminga kal hnena permit a pek chu a titawp.

Ram dang aṭanga ṭanpuina dawng tur hian NGO-te hian FCRA registration an tih ngei ngei a ngai ṭhin a ni.

Save The Children hi naupangte dikna chanvo humhim kawnga hma la ṭhin an ni a, naupang hriselna, zirna leh retheihna avanga harsatna tawkte ṭanpui chu an hna ber a ni. Ram hrang hrang 116-ah inzar pharhin, kum 2008 aṭang khan India-ah pawh Bal Raksha Bharat hming puin an kalpui ṭan a, tunah hian state 16-ah an ding tawh a ni.

Save The Children NGO-te FCRA license tihnun thar leh dilna hi sorkar laipui chuan kar hmasa khan a hnawl niin civil society sector hrang hrangte chuan an sawi a. MHA website-a organisation hrang hrang, FCRA license neite hming tarlanah pawh a tel tawh lo a ni. Hemi chungchangah hian Bal Raksha Bharat spokesperson chuan,"FCRA license kan dil ṭhat lehna pek kan ni lo hi mak kan ti hle. Sorkar laipui pawh kan dawr ṭha leh anga, a hma lama kan buaina chinfel theih hi kan beisei a ni. Chutih rual chuan mipui leh naupangte tana mamawh pek leh sem chhuah hna hi chu kan kalpui reng tho ang," tiin a sawi.