PM- in rel station 508 chei ṭhatna tur lungphum phum

Prime minister Narendra Modi chuan nimin khan video conference kaltlangin, India ram hmun hrang hranga rel station 508 chei ṭhatna tur lungphum a phum.

Rel station hrang hrang chei ṭhatna atan hian Rs. vbc 24,470 ruahman a ni a, hei hian rel hmangtute tana hmanrua leh rel changkang zawka thuam ṭhatna tur pawh a huam tel. Rel traffic siam remna tur atana hmanraw ṭha zawk bakah, rel station-te chu a awmna hmuna culture, mipuite nunphung leh duhdan mila sak a nih tur thu PM hian a sawi tel bawk.

Sorkarin rel station 508 a chei ṭhat turah hian state 27 leh UT-te a huam dawn a, Uttar Pradesh leh Rajasthan-a mi 55, Bihar-ah 49, Maharashtra-ah 44, West Bengal-ah 37, Madhya Pradesh-ah 34, Assam-ah 32, Odisha-ah 25, Punjab-ah 22, Gujarat leh Telangana-ah 21, Jharkhand-ah 20 leh Andhra Pradesh leh Tamil Nadu-a station 18 te an ni.

PM Modi chuan mipui hman tur atana transportation buatsaih reng reng hi a ṭha leh tunlai thei ang bera siam a ṭul thu a sawi bakah, rel chu mipui tam zawkin an hman nasat a nih avangin rel station-a hmanraw ṭha leh changkang ber ber dah chu pawimawh bik a tih thu a sawi.

Heng station leh hmunhma siam ṭhatna tur hi sorkar laipui scheme, 'Amrit Bharat Station Scheme' hnuaia kalpui tur a ni a, he scheme hnuaiah hian station 1,309 chei ṭhat tura ruahman a ni.