US Consulate Kolkatta leh CUTS international-te'n workshop buatsaih

US Consulate, Kolkatta leh CUTS (Consumer Unity and Trust Society) International chuan kar liam ta khan venhimna leh ralthuam lama India leh America thawh dunna kawng hrang hrang sawihona a buatsaih. Workshop thupui atan "Defence News Conclave: Stories of US - India Defence and Security Partnership" tih hman a ni.

Workshop-ah hian civil leh media lam ṭhahnem tak leh, ralthuam lama mi thiam leh ralthuam siam ṭhin industry neitute nen mi 100 chuang an tel. India leh US inzawmna hi khawvel huapa hmalakna langsar leh ngaihven, joint research bakah hmanraw insiam ṭawm, Indo-Pacific region-a inkungkaihna ṭha zawk leh ralthuam ṭha ber ber siam dun tura inrem nei an nih thu sawia PM Modi leh President Joe Biden te'n joint statement an siamte chu ngaihthlakho leh a ni.

US embassy, New Delhi-a US Army Attache, Colonel Douglas Hess chuan, "US leh India inṭhian ṭhatna hi internet kaltlanga inbiakna mai bakah insumdawn tawnna kawng thlengin tun hma zawng aiin a ṭha leh zual a ni tih hi hriat a ṭul hle. Vawi khat hmeh maiah khawvel hi a tiche thei tawh a ni," tiin a sawi. Adrian Pratt, Acting Consul General, Public Affairs Officer and Director of the American Center, U.S. Consulate General Kolkata pawhin,"India nena kan inzawm hian kan ram himna a tinghet a, kan ṭhanna tur a tichiang a ni," tiin a sawi ve bawk. Lieutenant General, Subrata Saha chuan tun hmaa India leh US inlaichinna dinhmun sawiin, India leh US-in 2+2 dialogue an lo neihte chuan ram pahnihte ṭhan dunna tur kawng a hawn zau phah hle niin a tarlang. Indo-pacific region-a India leh US inzawmnain chungchangah pawh India tel lo chuan Indo-pacific hi a awm thei lo a, chuvangin, India leh US hian helaia insumdawn tawnna ṭhan zelna atan an ṭan dun nasat a pawimawh thu Kalinga Institute of Indo-Pacific Studies Honorary Chairman leh hmu chhuaktu ni bawk, Chintamani Mahapatra chuan a sawi.

Workshop-a thusawi zingah hian Air Chief Marshal, Arup Raha, Chief of Air staff hlui leh CENERS-K President, Col. Baljinder Singh (retd.), Aerospace leh Defence director USISPF, India Office, Sucharita Bhattacharjee, Policy Analyst, CUTS International te an tel bawk a ni.