Kum 2 tang turin BJP MP Shankar Katheria hrem

Uttar Pradesh-a BJP MP, Shankar Ketharia chu kum 2011-a power supply company-a hnathawk pakhat kut a thlak avangin Agra court chuan thiam loh chantirin, kum hnih tang turin a hrem.

Ketharia hian 2011 khan Torrent Power Company office luhchilhin bungraw tam tak a tichhia a, he office-a hnathawk pakhat chu nasa takin a sawisa nghe nghe a ni. Representation of People Act, 1951 in dan a zam angin, mipui aiawha rorel tura thlante reng reng chu kum hnih emaw a aia tam emaw jail tang tura hremna pek an nih chuan,rorelna ina member an nihna aṭangin ban nghal tur tih a ni. Ketharia pawh hi ban mai theih dinhmunah a ding ta a ni.

November 2014 - July 2016 chhung khan Ketharia hi Union Minister of State for Human Resource Development a ni a, MP ṭum thum a nih tawh bakah National Commission for Scheduled Castes Chairperson a lo ni tawh bawk. Ketharia hian thubuai 12 a nei mek a ni.