Lok Sabha member-ah Rahul Gandhi dah let leh a ni

Supreme Court-in a thubuai a stay hnuah, Congress party hruaitu Rahul Gandhi chu nimin khan Lok Sabha member-ah dah let leh a ni.

Rahul Gandhi hi Kerala-a Wayanad Parliamentary constituency aṭanga Lok Sabha MP atana thlan a ni a, a thubuai stay a nih tak avanga MP aṭanga ban a nihna chu hlih a ni leh ta a ni. MP a nih leh tak avangin Lok Sabha-a no confidence motion sawiho hunah a tel thei dawn a, hei hian Congress MP-te phurna nasa tak a pek ngei a rinawm.

Gandhi hian kum 2019-a Karnataka inthlan campaign-naah rukru zawng zawngin Modi tih hming an pu tel chu mak a tih thu a sawi a, hei vang hian a lakah intihhmingchhiat thubuai theh luh a ni. March 23 khan Gujarat trial court chuan he thubuaiah hian thiam loh chantirin kum hnih tang turin a hrem. Hrem a nih tukah Lok Sabha member a nihna hlihsak a ni bawk. MP-te hi kum hnih emaw, a aia tam emaw tang tura hremna pek an nihin MP an nihna aṭangin ban theih an ni.

Gujarat trial court-in thiam loh a chantir hnuah Gandhi hi Supreme Court-ah kalin, an puhna chu a dik loh thu leh, hremna an pek chu a uchuak a ni tiin, a thubuai chu stay turin a dil. SC hian Zirtawpni liam ta khan a appeal hi ngaihtuahin a stay sak ta a ni.

Congress president, Mallikarjun Kharge chuan Rahul Gandhi-a MP a ni leh ta chu bul ṭanna thar ang a ni tih sawiin,"BJP leh Modi sorkar hian tun sorkar term-a an hun la neih ang ang hi democracy tichhe tura eptu hruaitute beihna atan ni loin, ram tana rorelna hun ṭhaah ngaiin an theihtawp chhuah rawh se," tiin a sawi.