Data Protection Bill hi press zalenna atan a hlauhawm : Editors Guild

Digital Personal Data Protection (DPDP) Bill chu August 3 khan Lok Sabha-ah pharh a ni a, he bill hi press mite zalenna atan a hlauhawm thei dawna an hriat thu Editors Guild of India chuan Pathianni khan an sawi.

Kum ruk liam taa Supreme Court chuan right to privacy chu fundamental rights a ni tia a puan hnuah he bill hi siam a ni. Dan thar tur ruahmannaah hian India mipuite mimal zalenna leh thuruk venhim a nih theih nan, tu pawhin mi pakhat chungchanga a thil hriat leh neihte a hman sual emaw, a theh darh emaw chuan Rs. vbc 250 thlenga chawitir theihna tur pawh a tel.

Mahse Guild chuan he DPDP section 36 hian sorkar chu mi tu pawh a duh apiang thu zawt fiah leh nawr lui thei turin thuneihna a pe ang a, chu chu press mite'n thuruk an chhuina kawnga harsatna siamtu a ni thei tih an sawi. Guild hian Lok Sabha Speaker Om Birla chu he bill hi standing committee ngaihtuahtir phawt turin an ngen a, prime minister Narendra Modi, Rajya Sabha chairman Jagdeep Dhandekar, IT minister Ashwini Vaishnaw leh party harng hrang hruaitute hnenah pawh lehkha pein, he bill chungchanga an hlauhthawnna leh an duh lohna te an thlen.

"He bill hian data protection lama dan khauh zawk keng tel mah se, tuna kan mamawh zawk a phuhru dawn lo a, chumi ep chiah chuan journalist leh an thu lakna thlenga chhui theihna turin sorkar hnenah thuneihna a pe dawn. Ram ṭhatna tur atana kawng daltu a ni thei dawn a ni tih hi Guild chuan kan sawi tel duh," tiin an tarlang.

Guild hian bill thar chu ṭha viau angin lang mah se, thil dik lo an chhuina kawnga mimal data an mamawhte pawh an neih theih loh phah fona tur, misualte him theihna tur hmanrua a ni thei dawn a ni, a ti. Hei vang hian he bill hi an dodal a, sorkar thununna piah lama awm tur thilah an ngai tih an sawi. DPDP bill hi nimina Lok Sabha-a ngaihtuah tura ruahman a ni.