Hindi thuhnuaiah kan kun lo ang - Tamil Nadu CM

Delhi-a Committee of Parliament on official language ṭhutkhawm vawi 38-naa union home minister Amit Shah-a'n ram puma ṭawng ang khat a duhna a sawi chu Tamil Nadu chief minister MK Stalin chuan na takin a chhang.

Amit Shah chuan ram pumah ṭawng inang khat hman a duh thu sawiin eptute pawhin dodal loin India ṭawng atana HIndi hman chu an pawm tur a ni, a ti. Mahse Tamil Nadu CM, MK Stalin chuan,"Hindi thuhnuaiah kan kun lo ang," tiin a chhang let a ni.

Committee of Parliament on official language hi kar hmasa Zirtawpni khan ṭhu khawmin, he meeting-ah hian Amit Shah chuan Hindi chu thawklehkhata a theih loh pawhin eptute pawhin ṭawng inṭawm atana an pawm chhoh a ngai tawh a ni, a ti. Hindi chuan hmangtu tam lamah el phatu a neih loh thu leh, ram pawhin India ṭawng chawikang chung chauhin hma a sawn ang, tiin a sawi.

MK Stalin chuan hei hi a Twitter-ah chhangin,"Union home minister Amit Shah-a'n ram puma Hindi hman nawra a thusawi hi ka pawm lo. Hindi hmang ve lote nekchep tumna a ni a, Tamil Nadu hian Hindi hman emaw hman tumna hi a dodal tlat a ni. Kan ṭawng leh kan hmunte hian kan nihna a keng tel a, Hindi hmang hian a thuhnuaiah kan kun lo ang," tiin a tarlang. Stalin hian Hindi hmang tura a nawrna kawngah Amit Shah chu vauin, Karnataka leh West Bengal te pawhin an dodal dawn tih a sawi tel bawk.