Lok Sabha-ah No-Confidence motion sawiho

Parliament monsoon session neih mekah eptu party-te chuan Manipur chungchang avanga sorkar rin tawk lohna, no-confidence motion an put luh chu nimin aṭang khan Lok Sabha-ah sawiho a ni.

No-confidence motion hi Congress MP Gaurav Gogoi-a put luh a ni a, sawiho a nih hnuah August 10 hian vote lak a ni ang.

Nimin khan motion pu luttu Gogoi chuan sawi hawnna neiin, sorkar lai chu rin ngam a la ni em tih hriat a duh tiin bul a ṭan. Manipur chungchanga prime minister Narendra Modi ngawih chuh tlatnain eptute chu no confidence motion pu lut turin a nawr lui a ni tiin, pum khata India siam sawi fotute hian Manipur chu tlang leh phaia cheng, hmun hnihah an ṭhen hrang a ni, a ti.

Gogoi chuan,"PM Modi ngawih tlat chhan hi pathum a awm a; state sorkar rorelna hlawhchham vang, home department hlawhchham vang leh ram rorelna kalpui ṭhat tawk loh vang a ni a, tin, a tihsual a pawm hreh avangin a sawi duh lo hrim hrim bawk a ni," tiin, PM chu House pahniha thusawi tura a phut thu a sawi bawk.

House-a no confidence motion sawihona neih a nih hma hian BJP chuan Thawhlehni zing khan parliamentary party meeting a nei a, motion kalh zawnga sawi tur hian BJP MP 10 bakah, Amit Shah, Nirmala Sitharaman, Smriti Irani, Jyotiraditya Scindia leh Kiren Rijiju te ruat an ni.

BJP sorkar chuan Manipur-ah hian kum 1993 leh 997 khan buaina nasa tak a lo chhuak tawh a, buaina chhuak avanga Parliament-a statement siam kher a nih loh thu leh, ṭum khat zawkah hian junior home minister-in a siam ve chauh thu an sawi a, tihdan phunga neih ni kher lo thil a nih avangin PM hian Parliament-a thu a sawi kher hi a ngai lo, an ti. Hetih lai hian eptute chuan mi 170 chuang an thihna leh hliam eng emaw zat awm a, mi sang chuangin chenna tur an neih lohna, Manipur-a hnam inkar buaina chhuak aia thil pawimawh dang hi a awm lo tiin PM-in House-a thu a sawi ngei hi an phut thung.

Kum 2018 khan Modi kaihhruai sorkar hian Telugu Desam Party hruaitu, Chandrababu Naidu put luh, no confidence motion a lo hmachhawn tawh a, vote 325 hmuin no confidence motion hi an lo hneh tawh. Tun ṭumah pawh hian Lok Sabha-a seat 570 awmah sorkarna siam tura vote 270 a ngaih laiin BJP hian vote 332 vel an nei anga ngaih a ni a, BJD leh YSR Congress-te'n an thlawp bawk avangin vote 366 lai hmu tura beisei an ni. Hetih lai hian eptu party intel khawm, I.N.D.I.A chuan Lok Sabha-ah hian vote 142 chauh an nei thung a ni.