US-in human rights chungchang India sawipui zel a tum

US president Joe Biden chu thla thar hian G20 summit neih turah India a lo kal dawn a, hemi denchhen hian US senior official pakhat chuan India chu human rights chungchangah US-in inbiakna a neihpui fo thu leh, la sawipui chhunzawm zel an tum thu a sawi.

US State Department thupuangtu, Matthew Miller chuan Thawhṭannia conference a neihnaah,"Human rights chungchangah US chuan a ṭhian ram dangte chu inbiakna a neihpui fo a, India pawh tun hmaa a neihpui ṭhin a ni a, kan la chhunzawm zel dawn a ni," tiin, Biden-a'n India a tlawh hunah India rama Kristiante laka tihduhdahna thleng ṭhin chungchang a sawipui ang em tih zawhna chu a chhang a ni.

Miller chuan,"Kristiante tihduhdahna thleng hi kan duh lo a, eng sakhaw mi pawh tihduhdah an nih chuan, khawvel khawi hmunah pawh ni se US chuan a dodal a ni tih hi chiang takin ka sawi duh," tiin a sawi.

India chu sakhaw zuitu tlem zawkte chunga hleihlenna chungchangah thil tidik tawk loah US-in a puhna hi May thla khan external affairs ministry thupuangtu, Arindam Bagchi chuan chhangin,"US official ṭhenkhatin ṭan bik nei taka India chungchang an sawina hian an thil hriatte a dik tawk lohna a tilang a ni. India hian US nena kan inzawmna hi a ngaihlu hle a, eng chungchangah pawh tlang taka thil kan sawiho theih kan duh," tiin a lo chhang tawh a ni.