No confidence motion sawihonaah Rahul Gandhi a ṭawng na

Parliament monsoon session neih mekah Congress MP Gaurav Gogoi chuan no confidence motion pu lutin, Thawhlehni khan sawiho niin, nimin chhunzawm a ni. Nimina motion sawihonaah hian eptu lam aṭangin Rahul Gandhi chuan sorkar rin tawk lohna sawiin, Smriti Irani chu BJP aiawhin a ding ve bawk.

Rahul Gandhi chuan BJP sorkar chu an politics khelh dan avangin Manipur-ah India an tihlum mek a ni tiin, Narendra Modi chu vawiin thlenga Manipur a la tlawh loh avanga a dem thu leh, Manipur chu India ramah a ngai ve lo niin a puh bawk.

Gandhi chuan,"Manipur-ah hian India a thi mek a, India nihna hi Manipur-ah chuan a liam mek a ni. Manipur-a thil thleng avang hian India nute thah an ni, hetah hian ka nu ṭhu mah se, Manipur-ah chuan India nu tam tak thah an ni," tiin, BJP chu ram ram hmangaihtu ni loin phatsantu zawk an ni, a ti. Rahul Gandhi hian minute 30 chhung a sawi a, Bharat Jodo Yatra a la zawh loh thu leh a la chhunzawm tur thu a sawi tel bawk. A thusawi zingah hian BJP sorkar leh Narendra Modi chu India enkawl ṭha loah puhin, amah ngei pawhin Manipur a tlawh tawh thu leh Modi-a pawh tlawh tura a phut thu te, BJP chuan India chu hmun hnihah an ṭhen a, an hal (Manipur leh Haryana) bawk a ni tih te leh Modi chuan Amit Shah leh Gautam Adani thusawi chauh a ngaihthlak thu te a sawi. BJP MP tam tak chuan Rahul Gandhi chu a ṭawngkam na tak avangin ngaihdam dil turin an phut.

Union Minister Smriti Irani chuan Gandhi thusawi hi chhangin,"India-a eirukna sawifiah dawna entirna ṭha ber in ni, rin tlak loh tih hi nangmahniah a hmuh theih. Nangni hi India in ni lo," tiin na takin a chhang ve bawk.

Smriti Irani hian Rahul Gandhi chu session neih laia flying kiss peah puhin a sawisel zui bawk. Speaker Om Birla hnenah lehkha a theh lut a, Parliament-a hetianga hmeichhe ngaihnepna a la thlen ngai loh thu sawiin,"Rahul Gandhi hian zahna a nei lo. Hmeichhe hnuaichhiah lutuk mihring chauhin Parliament-a hmeichhe MP ṭhu ve hnenah flying kiss a hmuh ang," a ti.

Sorkar rin tawk lohna sawihona hi prime minister Narendra Modi chuan vawiin hian Lok Sabha-ah a zawm ve dawn a, sawihona neih a nih zawhah vote lak a ni ang.