Kejriwal-a'n Rahul Gandhi lawmthu a hrilh

Aam Admi Party (AAP) hruaitu, Delhi chief minister, Arvind Kejriwal chuan Thawhṭannia Parliament-in a pass tak, Delhi Services Bill/Government of National Capital Territory of Delhi (Amendment) bill duh lo zawnga vote thlaktu Rahul Gandhi chu lawmthu hrilhna lehkha a thawn.

Kejriwal hian Rahul Gandhi leh Mallikarjun Kharge hnenah lawmthu sawina hi thawnin,"Delhi mipui vbc. 2 te aiawhin nangmahni leh in party thlawpna kan hmuh avang hian lawmthu ka hrilh duh che u a ni. Delhi mipuite chanvo humhim tura min beihpuina hi hriatreng ni se ka duh a, in thiltih hi Parliament chhungah leh pawnah pawh kan theihnghilh tawh lo ang. Constitution tana in rinawmna hi kum tam tak hriat a ni tawh ang a, constitution kalh zawnga chetna reng reng bei chhunzawm turin kan thawhho zel theih ka beisei," tiin a ziak a ni.

Parliament-a sawiho a nih hma pawha boruak ngah tak leh house chhunga inhnialna nasa tak a awm hnua pass tak, Delhi services bill tia hriat hian sorkar laipui chu Delhi chhunga sorkar hnathawk liante transfer leh posting chungchangah thuneihna pumhlum a pe a ni. House pahniha pass a nih tak avang hian President-in a hming a ziah hnan hunah dan anga hman theih a ni tawh dawn a ni. He bill duh loh avang hian Kejriwal leh a party, AAP chuan ram chhunga party zawng zawngte chu bill dodal zawnga thawhpui atan a sawm a, Delhi leh Punjab vela a elpui ber, Congress chuan he bill dodal hian AAP a thlawp a ni.