No-Confidence Motion : PM thusawi zawh hmain House aṭangin eptute chhuak

Parliament Monsoon session neih meka eptute'n Manipur state-a tualchhung buaina thleng avanga BJP kaihhruai, NDA sorkar rin tawk lohna, no-confidence motion an puh luh chu Thawhlehni aṭang khan sawiho a ni a, nimin khan Lok Sabha-ah prime minister Narendra Modi pawh inlanin, eptute motion put luh hi a chhang ve ta. Mahse PM thusawi zawh hmain eptute chu House aṭangin an chhuak a ni.

Congress MP Gaurav Gogoi put luh, no-confidence motion hi ni thum sawiho a ni a, House-ah member-te pawh an inhnial nasa hle.

I.N.D.I.A aiawha sawi hawngtu leh motion pu luttu, Gogoi chuan BJP sorkar chu Manipur hmun hniha ṭhen hrangah puhin, Manipur chungchangah PM Modi leh sorkar lam an ngawih reng angin, House-a PM thusawi tir turin a kaw tawpah an nawr a ngai a, no confidence motion hial an theh luh a ngaih phah a ni, a ti.

Nilaini khan Rahul Gandhi leh Smriti Irani-te pawh he motion chungchangah hian na takin an inkhak bawk a, tlai lamah Amit Shah chuan sawi ve lehin, no-confidence motion chu mipuite rilru tibuai tura put luh mai niin a sawi a, eptute chu midangte tan ni lo, anmahni leh an chhungte tan chauhah thil ti-ah a puh.

Nimina motion sawiho chhunzawm a ni leh a, union finance minister Nirmala Sitharaman chuan,"India hi economy ṭhang chak ber a ni mek a, kan tawn ngai loh a ṭha zawnga ṭhang turin kan dinhmun a ṭha. 2013-a economy tla chhe tur zinga India sawitu Morgan Stanley vek khan tunah chuan India hi sang takah dah tawhin, BJP leh Modi hian kum 9 chhung lekin India hi dinhmun ṭha takah min dah a ni. Kan GDP pawh kum thar lamah chuan a ṭhan belh zel dawn tih chu khawvel huapa agency hrang hrangte leh kan RBI ngei pawhin a thlir lawk dan a ni," tiin, sorkar lai chu rintlak a nih zia a sawi ve bawk.

PM-in motion put luh a chhang

PM Modi chuan nimin tlai khan Lok Sabha-ah motion put luh hi a chhang a, "Eptute'n he motion an lo pu lut hi kan tan chuan pathian malsawmna a ni, hun kal tawh thlir let chuan no confidence motion hian kan tan vanneihna a rawn thlen ṭhin a ni. Nakkum inthlan hi lo thleng leh chiah mah se NDA leh BJP te hian inthlan hnuhnung ber aia nasa khan hnehna kan chang ang, a chhan chu eptute tan hi chuan ram aiin an party a pawimawh zawk a ni," tiin a sawi.

"Khawvel mit hmuhah India dinhmun kan chawi sang a, tun hi India beisei leh hmathlir zawng zawngte tihhlawhtlin hun a ni. Kan Jal Jeevan Mission te, Kan Swach Bharat Abhiyan te chu IMF leh UNICEF te pawhin an fak em em a, hetiang karah hi chuan eptute hian min bei duh a nih chuan inbuatsaihna ṭha zawk nei tur an ni. Vawiina thil thleng hian kum 1000 atana kan ram innghahna tur a din dawn a ni," tiin, eptute chuan an beih nasat poh leh BJP chu an hlawhtlin zel tur thu Modi chuan a sawi bawk.

Sorkarna lo siam tawh Congress kaihhruai UPA chu na taka beiin,"Congress sorkar chu hmathlir leh thil tum nei lo, India thil tihtheihna pawh hre lo an ni," a ti a, "Kum 2028-ah pawh BJP sorkar lakah no confidence motion hi an rawn la pu lut leh ang," tiin, BJP chu inthlan leh hunah pawh an la chak leh ngei tur thu a sawi. Modi hian India mipuiiin Congress an duh tawh lohna an tihlan dan chu Tamil Nadu, Uttar Pradesh, Bihar, Nagaland, West Bengal leh Odisha aṭangin a hriat theih a, hmun tam takah pawh ṭum tam tak sorkar siam theih tawh lohna an neih thu a sawi. PM thusawi lai hian eptu MP-te chuan PM chu thil dang sawi lo a, Manipur chungchang sawi tura phutin house-ah hian "MANIPUR" tiin an lo au buai a ni.

Prime Minister thusawi zawhah hian no-confidence motion pass tur hian vote lak tur a ni a, mahse, PM thusawi lai hian eptu party MP-te chuan PM chu tualchhung buaina nasa tak thlen mekna, Manipur chungchang a sawi duh loh avanga lungawi loin House hi an chhuah san.

Lok Sabha-ah hian seat 539 awmin BJP hian MP 303 an nei a, NDA-a an thawhpuite nen chuan MP vote 366 an nei ang a ni. Hetih lai hian I.N.D.I.A hian MP 143 an nei thung a, ṭan lam nei lo MP 30 an awm bawk. No confidence motion hi pass ni tur chuan eptute tan hian thil theih loh tluk a ni.

Eptute hian Manipur tualchhung buaina thleng chungchanga PM Modi hi a ṭawng chhuah duh loh avangin tawng chhuak turin vawi tam tak an nawr a, Parliament in hnihah pawh Manipur chungchang sawi turin an phut a ni. Mahse vawi tam tak an phut hnuah pawh Modi hi a ngawih tlat avangin, ṭawng chhuahtir ngei tuma nawrin, a kaihhruai sorkar rin tawk lohna, no-confidence motion hi an put lut ta a ni.