Parliament Monsoon session a tawp

Parliament monsoon session, July 20, 2023-a neih ṭan chu nimin, August 11 khan tihtawp a ni a, bill pawimawh tak tak pass a nih karah Manipur-a tualchhung buaina thleng mek chu session boruak luahtu ber.

Rajya Sabha-ah chuan session tawp ni thlengin eptu MP-te'n rule 267 hnuaia Manipur chungchang rei zawk sawiho an la phut. Sorkar lam erawh chuan rule 176 hmanga rei lote sawihona chauh a pawm theih avangin Rajya Sabha chairman, Jagdeep Dhankar chuan inremsiam turin a ngen. House chhungah hian eptu MP-te chu 'Pradhan Mantri sadan me aao' (Prime Minister come to the house) tiin an au rual a, nimin-a Rajya Sabha rorel hi ṭum hnih lai tihtawp lailawk a ni.

Aam Admi Party (AAP) MP, Raghav Chadha chu house dan a zawm loh avangin suspend a ni a, a hmain AAP MP tho, Sanjay Singh chu house aṭang hian suspend a lo ni tawh bawk. Rajya Sabha-ah hian eptu MP eng emaw zat chu lungawi lohna lantir nan nimin thleng khan session an kal chhunzawm duh lo. Question hour neih niin, Rajya Sabha member term tawp mai tur; Shanta Chhetri, Pradeep Bhattacharya, Dineshchandra Jemalbhai Anavadiya, Jugal Lokhandwala, leh Sushmita Dev te thlahna thu sawi a ni. Rajya Sabha monsoon session hi chawhnu lam dar 3 vel khan an titawp.

Lok Sabha-ah session neih chhung hian bill 22 pass niin, international border aṭanga km 100 china central-in hmasawnna hna thawk tura thuneihna pumhlum a neihna tur, Forest Conservation (Amendment) bill, 2023; mimal data venghim tura dan khauh zawk siamna Digital Personal Data Protection Bill, 2023 leh Delhi-a group A officer-te transfer leh posting chungchanga Delhi kut aṭanga thuneihna chhuhsakna, The Government of National Capital Territory of Delhi (Amendment) bill, 2023 te chu a langsar zualte an ni.

Monsoon session-ah hian sorkar lai rin tawk lohna, no confidence motion put luh a ni a, August 8 - August 10 chhung khan sawihona neih a ni. MP nihna hlihsak a nih avanga session ṭan tirha tel thei lo, Congress hruaitu, Rahul Gandhi pawh motion sawihonaah hian a tel a, PM Modi pawh motion chhang hian house-ah thu sawiin, a thusawi laiin eptu MP-te chuan house an chhuah san. Motion sawiho nan hian darkar 19 chuang hun hman a ni a, mahse, pass a ni zo ta lo.

Session ni hnuhnung berah Lok Sabha-ah bill pathum; 1860 Indian Penal Code thlakna tur Bharatiya Nyaya Sanhita Bill te, Code of Criminal Procedure, 1973 thlakna tur Bharatiya Nagarik Suraksha Sanhita Bill leh Indian Evidence Act, 1872 thlakna tur Bharatiya Sakshya Bill te pass a ni. Union finance minister, Nirmala Sitharaman-i bill put luh, The Central Goods and Services Tax (Amendment) Bill, 2023 leh The Integrated Goods and Services Tax (Amendment) Bill, 2023 te chu eptu MP-te awm loh avangin sawihona nei loa pass a ni bawk. Lok Sabha session hi chawhnu dar 1:45 khan tihtawp a ni.