Mahua Moitra-i'n Smriti Irani a khak

Trinamool Congress MP, Mahua Moitra chuan Smriti Irani chu Rahul Gandhi flying kiss pek a sawisel chungchangah, "A thawhpui BJP MP pakhat, hmeichhe khuaikhem ṭhina puh chungchang engmah sawi duh si lo khan flying kiss a haw leh si," tiin a khak.

Nilainia no-confidence motion chungchang a sawi zawhah Rahul Gandhi hian sorkar lai MP-te ṭhutna lam hawiin flying kiss a siam, hei hi union minister Smriti Irani chuan amah bik chu flying kiss peah ngaiin Rahul Gandhi chet dan chu Parliament chhunga hmeichhe zah lohna leh thil thleng ngai lo a ni tiin na takin a sawisel zui. Parliament-a hmeichhe BJP MP- te pawhin Speaker Om Birla hnenah Rahul Gandhi chet dan demin, action lak an phut thu ziakin an thlen bawk.

Hemi chungchangah hian session zawh lamah Mahua Moitra chuan press mite zawhna chhangin,"BJP MP pakhat chu kan hmeichhe wrestler-te laka mawi lo taka che leh vau ṭhinah puh a ni a, Women and Child Development Mininster hian engmah a sawi lo. Tunah flying kiss avang mai maiin a thinrim leh si a, eng hi nge i ngaipawimawh dik tak chu ka pi?" tiin a ti el zui a ni.

Delhi Commission for Women chairperson, Swati Maliwal pawhin Smriti Irani chet dan chu a dem thu a sawi ve bawk."Flying kiss inpe ni awma lang chuan inhnialna a titam hle. Mi pakhat, a hming Brij Bhushan Singh, kan Olympic wrestler-te a room-a ko a, an taksa khawihsak a, khuaikhem ṭhintu chu a hnung tlar hnihna maiah khan a ṭhu ve. Eng vangin nge ani lakah khan a thinrim zawk loh?" tiin X-ah a tarlang.

Congress pawhin thuchhuah siamin, Gandhi hi hmeichhe zah lo zawngin a che ngai lo a, BJP hian Manipur buaina chungchang sawi loa pumpelh an duh avangin 'che mawi lo' tih vel mai mai hmangin mi rilru lak pen an tum a ni, an ti. Lok Sabha-a Congress whip, Manickam Tagore pawhin Smriti Irani chu," 'Rahul-phobia' (Rahul hlauhna) a nei a ni. Rahul-a a atchilhna aṭang hian tal chhuak teh se," a ti ve bawk.