Independence Day lawmnaah special guest 1,800 awm dawn

Independence Day lawmna pui ber, Delhi, Red Fort-a neih turah sorkar laipuiin Jan Bhagidari' hmanga sorkar rorelnaa mipui an tel ve theihna tur atana ruahmanna a siam kalpuina ni pah fawmin a bika sawm, special guest 1,800 vel an tel dawn.

Red Fort-a Independence Day lawmnaah hian prime minister Narendra Modi chuan hnam puanzar pawt parhin, ram mipuite tan thu a sawi ang.

Special guest tur atana sawm zingah hian thingtlang khaw ṭhenkhata Sarpanch an tihte an tel a, anni bakah hian Farmer Producer Organisation scheme aiawh te, Pradhan Mantri Kisan Samman Nidhi leh Pradhan Mantri Kaushal Vikas Yojana scheme dawngtu te, Central Vista Project hnuaia Shram Yogis (building sak hna thawktu), Khadi kaihhnawiha hnathawk tu, ramri kawng siamtu te, Amrit Sarovar leh Har Ghar Jal Yojana tihhlawhtlinnaa thawktu zawng zawng leh sikul zirtirtu, nurse leh sangha mantu te chenin an tel dawn a ni.

Kumin Independence Day lawmna pual hian Ministry of Defence buatsaihin online selfie contest a awm dawn bawk. Sorkar scheme leh hmalakna hrang hrangte tarlanna hmun bika siamte selfie-pui tur leh chu thlalak chu August 15 - 20 chhunga MyGov platform-a theh luh theih a ni ang. Thlakna tur hi hmun 12 thlan niin, heng hmun hrang hrang aṭanga selfie theh luh zinga a ṭha ber thlan chhuahte chuan lawmman Rs. 10,000 ṭheuh an dawng ang.

Independence Day lawmna hun kut ken tur hian Indian Army ruat an ni a, Prime Minister-in flag a pawh parh hunah pawh Major Nikita Nair leh Major Jasmine Kaur te chuan an pui dawn niin sorkar thuchhuah chuan a tarlang. Flag pawh parh zawh rual hian Indian Air Force-te chuan Line Astern formation an tih hmangin advanced light helicopter, Mark -III Dhruv aṭangin a hmunah hian pangpar an thlak ang.

Prime Minister hian Independence Day lawmna pual hian Pathianni khan social media-a a display picture chu 'Tiranga' (India flag) lemin a thlak tawh a, India mipuite pawh a tih anga ti ve tur hian a sawm nghal a ni.