India leh China-in corps commander talk nei dawn

India leh China chuan vawiin hian a vawi 19-na atan corps commander talk an nei leh dawn.

Inbiakna hi Chushul hmunah neih a ni dawn a, Ladakh khaw chhak lama ram pahnih sipaite inepa awm, indo tura intintuah rengte dinhmun chingfel tura ruahman a ni tiin defence thuchhuah chuan a tarlang. September 9-a Delhi-a G20 summit lo awm turah hian China President, Xi Jinping chu tel ve tura ngaih a ni a, hemi hmaa buaina chinfelna tur kawng an zawng ni-a ngaih theih a ni.

Defence-in an tarlan danin,"India chu a dinna ngaiah a la ding reng a, April 2020-a inremna kan neih tawh ang khan Depsang leh Demchok aṭanga inlak chhuah hi kan tum ber a ni. Inremnaah chuan tun hmaa kan patrol ṭhinna chen thlenga patrol leh theih pawh a tel a ni," a ti.

Depsang leh Demchok-ah te hian India leh China hian thu inchuh lian tak an nei. India chuan a kal theihna chin hmun pahnih a la awm thu sawiin, China erawh chuan thlahtute aṭanga an hmun a nih avangin India sawi hi an pawm thei lo thung. Helai ramri bawr vela ram pahnih sipaite duty-te hi an intibuai fo a ni.

Corps commander talk vawi 18-na hi April 23 khan China ram lama Chushul Medo hmunah, Shanghai Cooperation Oraganisaton hman hmaa neih a ni. Tun ṭumah hian India aiawhin Leh-a awm, 14 corps commander, Lt. Gen. Rashim Bali a tel ang.