Priyanka Gandhi lakah FIR theh lut

Congress general secretary, Priyanka Gandhi Vadra social media enkawltute lakah leh, Madhya Pradesh chief minister hlui, Kamal Nath bakah union minister hlui Arun Yadav-te chu social media lamah BJP sorkar chu eiru nasa leh, '50% commission sorkar' tia an puh avangin an lakah FIR theh luh a ni.

August 11 khan Priyanka Gandhi hian Madhya Pradesh-a contractor ṭhenkhat chuan commission 50% an pek hnuah chiah an bill pek an nih thu Supreme court-ah an zualko tiin X-ah a tarlang a ni. "Karnataka-a BJP sorkar chhe tak khan 40% commission a la ṭhin. Madhya Predesh-ah hian BJP hian eirukna lama an reord an khum leh a ni. Karnataka-a 40% commission sorkar kha mipuiin an paih thla a, tunah Madhya Pradesh mipuite'n 50% commission sorkar hi an paih thla ve leh ang," tiin a tarlang.

FIR hi Indore-a BJP legal cell-a hnathawk Nimesh Pathak-a'n complain a siam hnua theh luh a ni a. Indore-a Sanyogitaganj-ah IPC section 420 (inbumna leh bungraw inpek thu hlaa dawt sawi) leh section 469 (midang tihchhiatna atana thil lem siam chawp) te hnuaiah Inrinni khan FIR hi theh luh a ni. Madhya Pradesh-a BJP hruaitu pakhat chuan vauna thuchhuah eng emaw zat a tichhuak zui bawk.