Vawiinah Independence Day vawi 77-na lawm dawn

India-in British lak aṭanga zalenna a hmuh kum 76-na chu vawiin hian ram pumah lawm a ni dawn. Kumin hi Independence Day lawm ṭum 77-na tur niin sorkar laipui chuan thupui atan "Nation First, Always First" a thlang a, thupui zulzui hian I-Day lawmna programme leh thil dang engkim kalpui a ni ang.

British-in kum 200 dawn India a awp hnuah, Mahatma Gandhi kaihhruaiin India zalenna sualna bul ṭan a ni. July 4, 1947 khan Indian Independence Bill chu British House of Commons-ah put luh niin, kar hnih hnuah pass a ni. August 15, 1947 khan India chuan zalenna hmuin, zalenna a hmuhna atan hian Mahatma Gandhi bakah mi pawimawh leh ṭangkai tak tak, Jawaharlal Nehru te, Sadar Vallabhai Patel te, Bhagat Singh, Chandra Shekhar Azad, Subhas Chandra Bose leh mi dang eng emaw zat an awm.

Independence Day hi India ram pumah chawlha puan a ni a, a lawmna pui ber hi Delhi-a Red Fort-ah neih ṭhin niin, hetah hian Prime Minister-in India flag a pawt parh ṭhin. Sipai parade hmuhnawm tak hmuh tur a awm chhunzawm leh bawk. Independence Day puala Red Fort-a flag pawh parh hi India Prime Minister hmasa ber Jawaharlal Nehru-a'n Red Fort-a Lahori Gate chunga a tih aṭang khan chhunzawm zel a la ni.

Kumin Independence Day-ah hian prime minister Narendra Modi chuan Red Fort-ah flag a pawt parh leh dawn a, thu a sawi bawk ang. I-Day lawmna atan hian special guest tur mi 1,800 chuang, hna leh eizawnna hrang hranga thawkte sawm an ni a, hei hi sorkar laipuiin 'Jan Bhagidari' hnuaia a hmalakna, mipuite ram rorelnaa tel ve an nih lantirna tur atana tih a ni. Kum 2021 aṭanga hman ṭan, 'Azadi Ka Amrit Mahotsav' chu kumin I-Day-ah hian tihtawp a ni bawk ang.

PM Modi hi Red Fort tualah hian defence minister Rajnath Singh chuan a lo dawngsawng dawn a, combined inter-services leh Delhi Police guard-te'n salute lo pein Guard of Honour inspection-in a chhunzawm ang. Flag pawh parhnaah hian Defence Minister bakah Chief of Defence Staff, Army, Navy leh Air Force Chief te ṭheuhin an telpui dawn a ni.