Android 13 leh version ṭhenkhat him lo; sorkar laipuiin hriattirna a chhuah

Ministry of Electronics and Information hnuaia agency pakhat, Computer Emergency Response Team (CERT-In) chuan android version hrang hrang leh hman tlanglawn ber, android 13 pawh tiamin, a him loh theihna tam tak a awm nia an hriat avangin android hmangtute tan warning a tichhuak.

Android him tawk lohna an hmuh hi 'high severity' tiin, hacker emaw, a bei thiamte tan phone security chhe deuh aṭanga an thil duh lak emaw, phone khawih buaisak mai a awlsam dawn hle niin an sawi.

CERT-In hian India cyber khawvel himna ngaihtuah leh hacking leh phishing te pawh tiamin, cyber-security thila hmalak ngai apiang an khawih ṭhin a, tuna Android him lohna an hmuh chhuah pawh hi smartphone tam zawka hman a nih avangin ram himna atan a hlauhawm thei dawna an hriat thu an sawi. "Kawng hrang hranga android him lohna hmuh chhuah a nih hian hacker-te tan kan phone-a an duh apiang la chhuak thei tur leh blackmail hmanga kan chunga thuneih emaw, kan thil tihchhiat thlenga thil awm thei a ni," tiin official thuchhuah chuan a tarlang. CERT-In chuan android version him lo zual an sawi zingah android 10,11, 12,12L leh 13 te an sawi tel.

Android-te a him theihna tur atan CERT-In chuan android security patch thar ber a lo chhuah huna download vat a ṭul thu an sawi a, Google lam pawhin hei hi hriain security patch thar hi an dah chhuak tawh bawk a ni.