HP-ah ruah surin chhiatna hrang hrang thlen

Himachal Pradesh-ah ruah sur nasa takin chhiatna hrang hrang a thlen a, Shimla-a summer hill area-ah leimin avanga temple chimah mi pakua an thi a, mi eng emaw zat temple chim hnuaiah hian an la tang.

Ṭek nen thawka ruah baw hawk (cloudburst) surin chhiatna a thlenah Solan-ah mi pasarih an thi a, Jadon khuaah mi pathum chin hriat lohin an awm bawk.

Himachal-ah hian darkar 55 chhung chu chawl loin ruah a la sur a, hei hian tuilian tam tak siamin, Mandi, Sirmaur, Shimla, Hamirpur, Bilaspur leh Solan-ah te leimin leh thingkung tlu avangin in leh lirthei eng emaw zat a chhe tawh bawk a ni. Motor kawng 800 chuang khar zingah kawng pawimawh tak tak; Kalka-Shimla, Chandigarh-Manali, Shimla-Dharamsala leh Paonta-Shilai NH te an tel a, hei hian bus 2,000 chuang tlanna a tibuai a ni.

Chief minister Shukhvinder Singh Sukhu chuan DC zawng zawngte chu Pathianni tlai khan online meeting a neihpui. Nimin khan school, college, industrial training institute, engineering, polytechnic leh pharmacy college-te chu khar an ni a, postgraduate leh B.ed. exam pawh cancel a ni bawk.

Himachal Pradesh hian kumin hian ruah sur avanga chhiatna hrang hrang thlengah Rs vbc. 7020.28 hu zet a chan tawh a, mitthi 257 an awm tawh bawk a ni.