Republic TV hotu Arnab Goswami an man

Republic TV Editor-in-Chief Arnab Goswami chu kum 2018-a interior designer Anvay Naik leh a nu Kumuk Naik-te intihlum kaihhnawihah nimin khan Maharastra police-ten an man. 

Police official chuan kum 53 mi, Anvay Naik leh a nu hi Republic TV-in an pawisa ba an pek duh loh vangin an intihlum niin a sawi. Kum 2018 May thlaa Alibaug-a an bungalow-ah an intihlum a, Anvay-a'n a thih hmaa lehkha a hnutchhiahah Arnab Goswami, Feroz Shaik (IcastXSkimedia) leh Niteish Sarda (Smartworks) te chuan an pawisa bat, cheng vaibelchhe 5.40 chu an pe duh lo nia sawiin, hei vang hian sum lamah harsatna nasa tak an tawh phah niin a ziak. 

Police-te chuan hemi chungchang hi chhui zui mah se, kum 2019 April thla khan Arnab leh midang pahnihte puhna hi a dik lohna hailanna tur finfiahna ṭha a awm lo nia sawiin an titawp a ni. 

Mahse hemi hnu hian Anvay fanu, Adnya Naik chuan complaint thehlut thar lehin, kumin May thla khan an thihdan hi chhui chiang a ni leh dawn tih Maharashtra home minister Anil Deshmukh chuan  puangin, special team din turin a ti ta a ni.  

Arnab Goswami leh Republic TV network chuan an puhna hi thudik lo tiin an pha thung. 

Arnab Goswami man a nih chungchang hi BJP lam chuan na takin an sawisel zui a, BJP president JP Nadda chuan a twitter-ah Maharashtra sorkar thiltih dan chu emergency hun lai nen a tehkhin hial. Union minister Amit Shah, Prakash Javadekar leh Smriti Irani-te pawhin Goswami man a nih avang hian Congress an dem thu an sawi chhuak. Amit Shah chuan Congress leh a thurualpuite chuan democracy an palzut nia puhin, dik lo taka thuneihna hmanga Arab Goswami man a ni chu press freedom beihna a ni, a ti. 

Hetih lai hian Maharashtra home minister Anil Deshmukh chuan tumah dan chunga leng an awm lo tiin, state police-te chuan chuan dan ang taka hna an thawh thu a sawi. 

Congress party thupuangtu Supriya Shirnate chuan BJP-in nasa taka Goswami thlavang an hauhsak nghal mai chu mak a tih thu sawiin, journalist dangte laka thubuai siamsak an nih lai leh, UP-a thil dik lo thleng chungchang puanzartu journalist Supriya Sharma man anih khan engatinge BJP chu a ngawih reng si? tiin a zawt let.  Journalist zingah ṭhenkhat ṭan bik chauha an au chhuak chu thil zahthlak tak niin,  BJP chu zak hle tur an ni, tiin a chhang let a a ni.