Independence Day-a PM Modi thusawi vawi 10-na

Independence Day lawmna pui ber, Red Fort, New Delhi-a neihah prime minister Narendra Modi chuan nimin zing dar 7:30 khan flag pawt parhin, thuchah a sawi.

Narendra Modi hian Prime Minister a nih hnua Independence Day thuchah a sawi vawi 10-na a ni. A thusawi ṭannaah hian India khua leh tui zawng zawngte chu 'ka chhungte' tiin a ṭan a, Satyagraha movement kalpuitu, Mahatma Gandhi zahna chibai bukin, India-in zalenna a hmuh theihna kawnga mahni inphata thawktu, Bhagat Singh, Rajguru, Sukhdev leh midang tam takte pawh a hriatreng thu a sawi.

North-East state-a harsatna thleng mekte pawh sawiin, Manipur buaina pawh tireh turin sorkar laipui leh state sorkarin nasa taka an beih dun thu a sawi. "Kar eng emaw ti chhung chu Manipur-ah tharum thawh zawnga buaina thlengin, mi eng emaw zatin nunna hlu tak an chan a, kan nu leh kan unaunu te tihbawrhbanin an awm bawk. Zawi muangin boruak a ralmuang chho zel a, India pawh Manipur tan a ding tlat a ni tih ka sawi duh. Tun hnaia boruak ralmuang chho hi Manipur mipuite pawhin chhawm se, harsatna ching felna tur hian remna leh muanna kaltlang chauhin kan ti thei ang," tiin a sawi. "Inpumkhatna ka sawi hian, Manipur-a buaina a awm chuan Maharashtra-ah pawh kan tuar ve tih inpumkhatna ang a ni ka sawi" tiin a thusawi tawp lamah Manipur a lam ri leh bawk.

PM hian thu hrang hrang sawiin, Indopui pahnihna zawh hnu leh Covid-19 hri leng a tawp hnu hian khawvela ram hrang hrang thiltihtheihna inthlak chhoin, India pawhin kawng dik lam a zawh a, India leh a mi, vbc 140 te hian khawvel kalphung thlak tur hian theihna kan nei a ni, a ti. Thla thar aṭang hian 'Vishwakarma Yojana' atan Rs. vbc 13,00 ruahman a nih thu a sawi a, hei hi mi tin mamawh thiamna nei, lu met, lunghlu chher, insuk thiam ang chite dawmkanna tur a nih thu a sawi.

Modi hian Independence Day thuchah hi darkar khat leh a chanve zet a sawi a, nikum khan minute 74 a sawi tling lo deuh thung. Kum 2014-a Independence Day thuchah a sawi hmasak ber khan minute 64 a sawi a, kum 2017 kha a sawi rei loh ber ṭum niin, darkar khat a sawi tling lo deuh a ni. Kum 2016-a Independence Day thuchah a sawi khan darkar khat leh a chanve aia rei hret niin, hei hi a sawi rei ber ṭum a ni. Kum 2015 hma lama India Prime Minister-in Independence Day thuchah an sawi rei ber ṭum chu kum 1947-a Jawaharlal Nehru thusawi, minute 72 awh kha a ni.

Red Fort-a Independence Day lawmna hi khualṭha 2,000 chuangin a hmunah chhimin, heng zingah hian minister, ram dang palai, US Congressional delegation, thingtlang khaw hrang hranga sarpanch 400, nurse 50 leh an chhungte bakah zirtirtu thawk ṭha bik thlan 50 te an tel.