Kirti Chakra pali leh Shaurya Chakra 11 dawng tur President-in pawm

India sipai huaisen chawimawina sang ber dawttu, Kirti Chakra dawng turin Naxal hel beihnaa nunna chan Central Reserve Police Force mi pali thlan an ni. Kirti Chakra dawta chawimawina sang; Shaurya Chakra dawng turin Indian Army pakua bakah, Jammu & Kashmir Police leh CRPF mi pakhat ve ve thlan an ni bawk. Chawimawina dawng turte hi President-in a pawmpui tawh a ni. Chawimawina dawng tura thlan zinga mi pangate hi an thi tawh a ni.

Thawhṭanni tlai khan President Murmu chuan chawimawina dawng tura rawtte hi a pawm a, Armed forces leh Central Armed Police Force (CAPF) te bakah hian chawimawina dang 61 a pe chhuak tel dawn a ni. Force mite chawimawina bakah hian Sena medal 54, Nao Sena Medal 3 leh Vayu Sena medal 4 pek chhuah a nih tur thu Defence Ministry chuan an sawi. "Military operation hrang hranga an chet ṭhat avanga Mention-in-Despatches hlan tur Army zinga mi 30, Army ui Madhu (Thi tawh) leh Air Force mi pakhat an tel bawk a ni," tiin an thuchhuahah an tarlang.

Kirti Chakra dawng tura thlante chu; Dilip Kumar Das, Raj Kumar Yadava, Bablu Rabha leh Sambha Roy te an ni. Chawimawina hlan turte hi Operation Rakshak, Operation Snow Leopard, Operation Casualty Evacuation, Operation Mount Chomo, Operation Pangsau Pass, Operation Meghdoot, Operation Orchid, Operation Kalisham Valley, Rescue Operation leh Operation Evacuation-ah te an tel hlawm a ni.

President hian Indian Coast Guard parukte huaisen avanga chawimawina hlan tur pawh a pawm tel a, President's Tatrakshak Medal (PTM) pakhat leh Tatrakshak Medals (TM) panga a hlan tel dawn. An duty laia hnathawk ṭha, Commandant Anurag Shukla, Sultan Singh leh Pradhan Navik (Thi tawh te) pawh Tatrakshak Medals hlan tur zingah hian an tel.