Karnataka sorkarin kum tharah NEP hmang tawh dawn lo

Karnataka chief minister Siddaramaiah chuan Thawhṭanni khan Karnataka Pradesh Congress Committee general body meeting-ah National Education Policy (NEP) hman mek chu an state-ah kum thar aṭanga an tihtawp tur thu a sawi.

Siddaramaiah chuann "Sorkar hmasa BJP khan Karnataka-ah NEP hmangin zirna an kalpui a, kan sorkar erawh hi chuan India constitution nena inmil zirna, State Education Policy (SEP) kan duang a ni," a ti.

NEP chu ruahmanna ṭha zawk siama an thlak a ṭul thu leh, inthlan result nghaka sorkar thar siam hmaa zirna an lo ṭan tawh avangin leh zirlaite tana harsatna thlen lo turin kuminah chuan NEP chu an hmang tlang rih phawt dawn niin a sawi bawk. Siddaramaiah chuan NEP chu zirlai bakah nu leh pa, zirtirtute pawhin duh loa an dodal thu a sawi.

Karnataka hi August 2021 khan NEP hmang hmasa ber niin hetih laia eptu party Congress chuan sorkar lai chu Nagpur-a RSS headquarter leh RSS thil tum sawi chhe chungin 'Nagpur Education Policy' hmang tiin a lo sawisel tawh a ni.

Tuna Congress sorkar hian NEP hman tihtawp hi inthlan manifesto-ah an nei a, budget session hnuhnung berah khan CM hian NEP chu State Education Policy (SEP)-a an thlak tur thu a sawi bawk.