China-in AP ramri bulah rel kawng siam dawn

China chuan Arunachal Pradesh ramri bulah Sichuan-Tibet Railway line siam hna a thawk ṭan tawh dawn nia sawi a ni. 

He relkawng hi Tibet- Linzhi leh Sichuan province chhim thlam lam Ya'an inkalpawhna tur a ni a, he project thawhna atan hian China sorkar chuan US dollar tluklehdingawn 47.8 a ruahman a ni. Linzhi hi Nyingchi tia hriat a ni bawk a, Arunachal Pradesh ramri bul maia awm a ni. 

He project hi China-in Tibetan plateau-a railway project lian a siam pahnihna a ni. Hemi hma hian Qinghai-Tibet railway line a lo siam tawh a, hei hi hman a ni tawh bawk. 

Tibet- Linzhi rel kawng siam tur hi km 1,011-a thui a ni dawn a, station  26 a awm ang. 

China chuan Arunachal Pradesh state hmun ṭhen­khat hi Tibet chhim lam huam chhunga awm niin a ram chinah a chhal a, hei hi India chuan a pawm lo a ni.