Sachin Pilot-a'n BJP hruaitu Tweet a chhang

Congress party hruaitu, Sachin Pilot chuan BJP MP, IT department changtu ni bawk Amit Malviya-a'n kum 1966-a Mizorama bomb thlaktu tia a pa, Rajesh Pilot a puhna chu a chhang let.

Sachin Pilot chuan Malviya thusawi chu a dik tawk loh thu leh, a pa chu 1966 kum tawp lamah air force-a a luh chauh thu a sawi.

Amit Malviya hian Rajesh Pilot leh Suresh Kalmadi-te chu March 5, 1966-a Mizoram khawpui, Aizawl bomb-tu thlawhtheihna khalhtute an ni tiin,"Anni pahnih hi Congress MP leh Minister hial an ni chhunzawm a ni. Indira Gandhi hian politics hi induhsakna hmunah a hmang ṭhin tih hi a chiang a. Mahni mi leh sa ngei bomb-tute pawh a duhsak a ni," tiin a tarlang.

Pilot hian Amit Malviya tweet hi chhangin,"I thil sawiah hian a hun leh i hriat dan a dik lo a ni. Air force pilot ni ṭhin ka pa hian bomb a thlak ṭhin ngei mai, mahse, i sawi ang ni loin, 1971-a India leh Pakistan indonaah khan East Pakistan ramah a thlak zawk. March 5, 1966-ah, Mizoramah ni loin. Ka pa hi Indian Air Force-ah hian 1966 October 29-ah a lut chauh a ni," tiin Sachin hian IAF-a a pa lak luh a nihna certificate thlalak dah telin a tweet zui ve nghal.

Prime miniter Narendra Modi chuan kar liam ta khan Manipur tualchhung buaina chungchang avanga eptute'n BJP sorkar laka no-confidence motion an put luh a chhannaah, Air Force-te'n Mizoram an beih dan hi sawi chhuakin, Congress chuan north-east chu an lo en hrang ṭhin zawk fe a a ni, a ti.