CAG-in Swadesh Darshan Scheme tih dik loh hai lang

Sorkar laipui hnuaia Ministry of Tourism hmalakna, Swadesh Darshan Scheme (SDS) chu hun tiam chhunga state leh Union Territory-te hnenah chhanna an la pek loh avangin Comptroller and Auditor General (CAG) chuan an audit-na aṭangin thil dik lo tam tak a awm tih a sawi.

Audit-na aṭanga a lan danin tourism ministry hian project 202 rawtte en dikna atan kum 6 zet an hmang. Kum 2015-2019 inkara project 71 rawtte chu August-October 2019 inkarah theh luh chauh niin, chung project-te chu October 2017-a scheme kalpui dan tura ruahman anga kalpui tho turin an la rawt zui bawk niin CAG chuan a sawi.

Parliament session hnuhnung bera CAG audit report-a a lan danin,"Project 131-te chu November 2021 khan en ṭhat mek a nih chhuanlamin pek let a ni. Project 202 ruahman aṭanga project 96 rawtna siam zinga 10 chu kum ruk zet en ṭhat nan leh pek letna hun atan hman a ni," tiin a inziak. Tourism ministry hian rawtna 43 te chu hmalakna awm loin kum 3 chhung an tikhawtlai a, heng zinga pakuate hi theh luh a nih aṭanga kum 5-6 hnuah pek let chauh an ni. Federal auditor hian state 13-a project 76 zingah tourist circuit kaihhnawih 10 aṭangin project 14, ministry-in en ṭhat tura a pawm an thlang chhuak leh a ni.

CAG chuan Tourism Ministry chu he scheme chungchanga hma thlir leh kal tum dan nei loah a puh. "Ministry hian project zawh hun atan hian state-te hnenah thla 18-36 a pe a, anmahni zawk hian project bul ṭanna tur rawtna hi kum 6 te an tikhawtlai leh a, a ṭhen phei chu action lak miah loa dahte pawh an nei a ni," tiin a sawisel.

Swadesh Darshan Scheme hi kum 2015 khan Rs. vbc 500 ruahmana bul ṭan a ni a, ram chhunga tourism infrastructure tihhmasawnna tura tih a ni. He scheme hnuaiah hian 2015-2019 inkar khan district 243 huam chhunga hmun 910-ah project 76 siamna tur sum pek chhuak a ni tawh a, tourism lamin an tarlan danin project 63-te hi zawh tawh an ni. He scheme hi tunah hian thar thawh leh niin, Swadesh Darshan Scheme 2.0 tih a ni a, khualzinte tlawh tur hmun siamna turin hmun 55-ah project thar kalpuina tur an rawt fel leh tawh bawk a ni.