Khawpuia retheite tana in sakna tur scheme ruahman

Prime minister Narendra Modi chuan Independence Day thuchah a sawinaah khawpuia mi retheite ṭanpuina tur scheme an ruahman thu a sawi. He scheme hmang hian khawpuia awm, mahni in leh lo nei lote'n in an sak theihna tur atan bank aṭangin a pung tlem zawka loan lak theihna tur siam a ni ang, a ti.

Red Fort-a a thusawiah Modi chuan khawpuia cheng, sum la lut tlem site harsatna tawh hi a nasat thu sawiin,"Middle class chhungkua kan tihte hian mahni puala in neih ve theih an chak em em. An harsatna sukiang tur hian ruahmanna kan nei a ni. Tun aṭanga rei loteah middle class chhungkua, mi in luah leh a remchan dan anga khawsate ṭanpuina tur scheme hi kan la kalpui vat ang," tiin a sawi.

PM hian in sak ṭanpuina tur scheme thar ruahmanna an neih thu hi sawi mah se, sorkar laipui hian Ministry of Housing and Urban Affairs (MoHUA) bul tumin, kum 2015 aṭang khan Pradhan Mantri Awas Yojana Urban (PMAY-U) an kalpui mek. Hei hi khawpuia mi retheite in sak ṭanpuina tur tho a ni.

PMAY-U hnuaiah hian in, nuai 75.51 sak zawh tawh a ni a, heng zinga nuai 71.39 hi luah a ni tawh niin sorkar laipui chuan Rajya Sabha a hrilh. Uttar Pradesh-ah in sak zawh tawh tam berin, nuai 12,87,307 zawh a ni tawh a. Gujarat leh Andhra Pradesh-in dawtin, nuai 8,80,209 leh 8,08, 278 ve ve an sa zo tawh bawk a ni.