Shimla-ah lei a min chhunzawm zel, ruang 2 chhar a ni

Himachal Pradesh khawpui,Shimla-a Krishna Nagar bialah Thawhlehni khan lei min avangin in pariat a chhia a, sa talhna hmun pakhat a chhe tel bawk. Leiminna hmunah hian ruang pahnih chhar a ni.

Chief Minister Sukhvinder Sukhu chuan he lai ina chengte hi hlauhthawn thilah Thawhlehni zing khan insawn chhuahtir vek thu a sawi. Leiminna hmuna chhanchhuah hna thawk tur hian Indian Army column khat an kal a, heng Indian Army-te hi Shimla, Fatehpur leh Indora vela tuilian avanga harsatna tawkte chhanchhuah leh ṭanpui hna thawk tura awm sa an ni.

Thawhṭanni khan Shimla-ah hian hmun hnihah nasa takin lei a lo min tawh bawk a, Summer hill-a Shiva temple-ah leh Fagli-ah te leimin hi thlengin, mi 16 an thi a ni. Himachal Pradesh hian ruah sur nasa avangin harsatna a tawk mek a, ruah baw hawk leh ṭek thawk bakah hmun hrang hrangah leimin avangin kawng khar a ngai hial a ni.